Pavlodarda «Qazaqsha sóıleý ońaı!» til jobasy bastaý aldy
Jobany negizgi iske asyrýshylar - Pavlodar oblysynyń Qazaqstan halqy Assambleıasy, «Qoǵamdyq kelisim» KMK, oblystyq QHA jastar birlestiginiń jastar isin úılestirý keńesi jáne «Serpin iskerleri» qoǵamdyq ókilderi. Úılestirýshilerdiń aıtýynsha, negizgi maqsat - jastardy ulttyq rýhanı zerdeleý arqyly memlekettik tildi keńinen nasıhattaýǵa, qazaq tilin meńgertýge jáne ómirde qoldanýǵa baǵyttaý, dep habarlaıdy pavlodarnews.kz .
Atalmysh jobaǵa memlekettik tildi bilmeıtinder men «Serpin» baǵdarlamasy boıynsha bilim alatyn stýdentterden turatyn jupqa bólingen 14-29 jas aralyǵyndaǵy jastar qatysady. Juptar birlesip qarym-qatynas jasaý arqyly qazaq tilin ońaı meńgeredi. - Memlekettik tildi úıretý arqyly qoǵamdyq kelisimdi jáne ultaralyq birlikti nyǵaıtýǵa, jastardyń qoǵamdaǵy belsendiligin arttyrýǵa jol ashylady. Sonymen qatar, memlekettik tildi úırenýdiń jańa formattaryn izdeý, úıretý ádisnamasynyń sapasyn arttyrý bolyp tabylady, - deıdi osy sharanyń moderatory, oblystyq QHA jastar birlestikteriniń úılestirý keńesiniń tóraıymy, respýblıkalyq QHA múshesi Elına Paýlı.
Joba aıasyndaǵy kezdesýler, trenıngter 2017 jyly 1 qarasha - 2018 jyǵy 1 naýryz aralyǵyna deıin jalǵasady. Joba qorytyndysy boıynsha kelesi jyldyń naýryz aıynda memlekettik tildi úırenýshiler arasynda saıys ótkizilip, jeńimpazdar marapattalady. - Joba taqyryby óte qyzyqty, bizdiń memlekettik tildi meńgerýge baılanysty. Memlekettik tildi bilý - bizdiń azamattyq paryzymyz jáne ýaqyttyń talaby. Qazaq tili óte baı jáne qazirgi kezde ony meńgerýge óte úlken múmkindikteri bar. Menińshe, qazaq tilin bilý, úırený orys tildi jastardyń rýhanı baıýyna jeteleıdi. Biz óz eliniń patrıottary retinde óz ana tilimizdi damýytymyz kerek, - deıdi tarıh ǵylymdarynyń doktory, S.Toraıǵyrov PMÝ-nyń QHA kafedranyń meńgerýshisi, professor Sáýle Mamytova.
