Pavlodarda Ertis ózeniniń sol jaǵalaýynda eko-qalashyq salynady
PAVLODAR. KAZINFORM - Jobalaýshylar qurylys ózenniń ekojúıesine nuqsan keltirmeıdi dep sendirip otyr. Bul jerde shaǵyn demalys úıleri men akvapark salynady.
Pavlodar qalasy týrıstik áleýetin kúsheıtýge kúsh salyp jatyr. Іri jobanyń biri - Ertis ózeniniń sol jaǵalaýynda salynatyn eko-qalashyq. Shahardyń ózi oń jaǵalaýda ornalasqandyqtan eko-qalashyqqa bolashaqta ózen ústi arqyly jetýge bolady, sondaı-aq Atameken kenti arqyly kólik joly salynýy múmkin.
Oblys ákimi Asaıyn Baıhanovtyń aıtýynsha, qazirgi ýaqytta «KAZAKH INVEST «Ulttyq kompanııasy» AQ-nyń qatysýymen ınvestıtsııalyq kelisim pysyqtalýda.
«Eń mańyzdysy - jobanyń ekologııalyq bóligi. Qoqysty shyǵarý, sýmen jabdyqtaý jáne kárizben qamtamasyz etý máselelerin pysyqtaý qajet», - dedi óńir basshysy.
Pavlodarnews.kz saıtynyń habarlaýynsha, jobany jergilikti kásipker Ilıa Mýhortov júzege asyrmaqshy. Investor eko-qalashyq Ertis jaıylmasynyń ekojúıesine eshqandaı zııan keltirmeıdi dep otyr.
«Qazir kóptegen zamanaýı, ekologııalyq turǵydan taza qurylys materıaldary bar. Mysaly, biz aýmaqta septık qoıamyz, ózenge sarqyndy sý quıylmaıdy. Ári birde-bir aǵash zardap shekpeıdi. Ekoqalashyq shamamen 2,5 gektar jerdi alady. Bul aýmaqta «A-Frame» túrindegi 15 úı jáne aǵash podıýmdardaǵy glempıngter ornalastyrylady. Árqaısysyna 4-12 adam syıady. Joba kúrdeli qurylystan emes, tek modýldik konstrýktsııalardan turady», deıdi kásipker.
Bul jerde zamanǵa saı jaǵajaı jasalyp, akvapark salý oıda bar. Eko-qalashyq qysta da qyzmet kórsete alady.
