Pavlodarda «Ertis» mýltımedıalyq mýzeıi ashyldy
Biregeı mýzeı Esenálıev kóshesi, 2 mekenjaıyndaǵy eki qabatty ǵımaratta ornalasqan. Bir sátte 600 adamdy qabyldaı alatyn mýzeı álemniń iri tarıhı-jaratylystaný mýzeıleriniń úlgisimen qurylǵan. Onda geologııa, fızıkalyq geografııa, ejelgi flora men faýnasynan, Ertis-Baıan óńiriniń paleozoı zamanynan bastap kazirgi kezeńge deıingi tarıhyn qamtıdy.
«Búgin tarıhqa enetin oqıǵa oryn alýda. Pavlodar oblysynda sońǵy ret 1992 jyly mýzeı ashylǵan eken. «Rýhanı jańǵyrý» arqasynda osyndaı jobany júzege asyryp otyrǵanymyz qýanyshty. ERG kompanııasy 300 mıllıon teńge qarajat bólip, Ertistiń boıynda osy mýzeı ashyldy. Jaǵalaýymyz odan ári árlene tústi dep oılaımyn. «Uly dalanyń jeti qyry», «Tsıfrly Qazaqstan» aıasynda biregeı tsıfrlyq mýzeı salynyp otyr. Salynýyna atsalysqandardyń barshasyna alǵys aıtamyn. Pavlodar qalasyna kelgenderge bul mýzeı óte qyzyqty bolady dep senemin», - dedi mýzeıdiń ashylýynda oblys ákimi Bolat Baqaýov.
Jalpy aýdany 2,4 myń sharshy metrdi quraıtyn mýzeıde 300-den astam eksponat bar. Jańa mýzeı burynǵy órt sóndirý jáne avarııalyq qutqarý qyzmeti mýzeıiniń ornyna ashyldy.
Mýzeı dırektory Gúlnár Nurahmetovanyń aıtýynsha, bul ólketaný mýzeıiniń fılıaly. Tujyrymdamasyn jasaýǵa 2 jyldaı ýaqyt ketken.
«Tarıhymyzdy zamanaýı túrde kórsetkimiz keldi. Qazaqstanda bundaı mýzeı joq. Tek Reseıde bar. Biz sol Reseıdegi mýzeıge baryp, bárin qarap shyqtyq. Ǵalymdarmen jumys jasadyq. Aýmaǵy keń bolǵandyqtan mýzeı túni sııaqty sharalar kóp ótip turatyn bolady. Eń eski eksponattar – ejelgi buǵy men bızonnyń qańqalary. Olar 10 myń jyldan asqan janýarlardyń qańqasy. Eń jańasy – ejelgi ańdarǵa qarap jasalǵan zamanaýı kóshirmeleri. Mýzeıde barlyǵy 33 adam jumys jasaıdy. Sonymen qatar, mýzeıde Pavlodar oblysynyń geologııalyq jáne sakraldy oryndarynyń kartasy bar», -deıdi Gúlnár Nurahmetova.
