Pavlodarda eki mınýtta quımaq ázirlep beretin robot qurastyryldy

ASTANA. QazAqparat - Pavlodarda № 11 jalpy orta bilim berý mektebiniń 5-synyp oqýshylary Artem Malyh jáne Aıpara Syzdyqova tańǵy asqa eki mınýtta quımaq ázirlep beretin robot qurastyrdy, dep habarlaıdy pavlodarnews.

Olar ózderiniń bul jobasyn búgin Nazarbaev zııatkerlik mektebinde robot tehnıkasy boıynsha halyqaralyq baıqaýǵa irikteý barysynda tanystyrdy.

"Mektepte saýalnama júrgizýdiń nátıjesinde oqýshylardyń 90 paıyzy tańǵy as iship úlgermeıtini anyqtaldy.Keıbireýi sýyq býterbrodtar jeı salady. Sondyqtan jýynyp, jattyǵý jasaǵanǵa deıin bul robot quımaqtar jasap qoıady. Eki mınýttyń ishinde eki jaǵyn aýdaryp qýyryp beredi. Adam qamyrdy ydysqa quıyp qoısa bolǵany, qalǵanyn mashına ózi atqarady. Robottardy jınastyrýǵa úsh apta ýaqyt ketti", - deıdi Aıpara Syzdyqova.

Nazarbaev zııatkerlik mektebi ınformatıka jáne robot tehnıkasy pániniń ustazy Qýanysh Maǵaýınnyń aıtýynsha, baıqaýdyń taqyryptary jyl saıyn aýysyp otyrady. Mysaly, byltyr «Jasyl energııa» aıasynda robottar qaldyqtardy suryptap konteınerge jetkizip, tabıǵatty saqtaýǵa kómektesý maqsatynda jasalǵan.

Bıyl «Azyq-túlik» taqyryby tańdalyp otyr. Sebebi, halyqaralyq kezeń ótetin Taılandta tamaqtaný ózekti máselege aınalǵan. Tómengi satyda jemister men kókónisterdi úsh mınýtta suryptaıtyn, ortasha sanatta eki mınýttyń ishinde aýyl sharýashylyǵymen aınalysatyn robottar ázirlense, joǵary sanatta teńizge shyqqan korablder konteınerlerde taǵamdardy úsh mınýtta jetkizýi tıis.

"Búgingi jarysqa 8-18 jas aralyǵyndaǵy 200-den astam oqýshy keldi. Ásirese, quımaq jasaıtyn robot pen topyraqtyń qunarlyǵyn zertteıtin, kóshetterdi otyrǵyzyp, sýaratyn robottar erekshe kózge tústi", - deıdi Qýanysh Maǵaýın.