Pavlodarda bilim berý uıymdaryndaǵy tekseristen soń 10 mln teńge únemdeldi
PAVLODAR. KAZINFORM — Oblystyń bilim berý uıymdaryndaǵy azyq-túlik baǵalaryna júrgizilgen tekseris nátıjesinde memlekettik satyp alýdaǵy artyq shyǵynnyń joly kesilgen. Nátıjesinde bıýdjettiń 10 mln teńgesi únemdeldi.
Pavlodar oblysy boıynsha ekonomıkalyq tergep-tekserý departamenti basshysy orynbasarynyń mindetin atqarýshy Jolaman Qınalbekovtyń aıtýynsha, mekeme mamandary memlekettik satyp alý portalyndaǵy derekterdi júıeli túrde taldap, baǵalardy naryqtyq kórsetkishtermen salystyrady. Eger satyp alý quny shekten tys joǵary bolsa, bul týraly oblystyq saýda jáne tutynýshylardyń quqyqtaryn qorǵaý departamentine habarlama joldanady.
— Taldaý barysynda baǵanyń negizsiz ósýi qyryqqabat, kartop, pııaz, sábiz, birinshi sorttaǵy un jáne jumyrtqa sekildi áleýmettik mańyzy bar ónimder boıynsha tirkeldi. Máselen, keıbir jaǵdaılarda qaraqumyq baǵasy 191 paıyzǵa, birinshi sortty un 238 paıyzǵa, kartop 78 paıyzǵa, al sábiz 30 paıyzǵa qymbat kórsetilgen. Biraq satyp alý úderisi aıaqtalmaı turyp anyqtalǵandyqtan, tek aldyn alý sharalary qabyldandy, — deıdi ol.
Osylaısha, artyq shyǵyndarǵa jol berilmeı, bıýdjettiń 10 mln teńgesi únemdelgen.
Óńirde osydan úsh jyl buryn qurylǵan oblystyq komıssııa áleýmettik mańyzy bar azyq-túlik baǵalarynyń turaqtylyǵyn turaqty túrde baqylap keledi. Onyń quramyna ákimdik, aýyl sharýashylyǵy, kásipkerlik jáne bilim basqarmalary men ekonomıkalyq tergep-tekserý departamentiniń mamandary kiredi.
Bıyl komıssııa men departamenttiń birlesken jumysy nátıjesinde 16 artyq deldal anyqtalyp, olardyń qyzmeti toqtatylǵan. Bul óz kezeginde óńirde azyq-túlik baǵasynyń ósýin tejegen.
Buǵan deıin Qazaqstanda azyq-túlik baǵasyn turaqtandyrý baǵytynda qandaı jumystar qolǵa alynǵany týraly jazǵanbyz.