Pavlodarda alaıaq dúken ıesin de, satyp alýshyny da aldap soqty
PAVLODAR. KAZINFORM – Pavlodarlyq azamat mobıldi qosymshadaǵy ınternet dúken arqyly jalpy quny 1 mln 300 myń teńge turatyn qaıyq motoryn satyp alý úshin tólem júrgizgen. Alaıda bul dúkendi ıesi ózge bireýge jalǵa bergeni, al ol satyp alýshyny aldap soqqany belgili boldy.
Sotta qaralǵan is materıaldarynda aıtylǵandaı, ótken jyldyń qazan aıynda jergilikti turǵyn mobıldi qosymsha arqyly jeke kásipker M.-dan qaıyq motoryn satyp almaqshy bolǵan. Ol úshin bankten árqaısysy 650 000 teńgeden, jalpy somasy 1 300 000 teńge eki nesıe resimdegeni anyqtaldy. Tólemdi QR kod-ty paıdalaný arqyly júrgizip, satýshynyń banktik shotyna 1 300 000 teńge jibergen.
«Alaıda atalǵan taýar tutynýshyǵa jetpegen. Budan soń azamat M. jeke kásipkerligine qatysty sotqa aryz túsirdi. Sot alǵashqy satydan-aq ony qoldap, 1,3 mln teńgeni óndirip alý týraly sheshim shyǵardy. Biraq kásipker bul sheshimmen kelispeıtinin bildirip, sotqa talap aryz túsirdi. Onyń aıtýynsha, ınternet dúkenin ózge tulǵaǵa jalǵa bergen, al ol óz kezeginde alaıaqtyqpen aınalysyp talap qoıýshyǵa joq taýardy satqan. Internet-dúkendi basqa tulǵaǵa jalǵa berý, onyń ishinde banktik shotty paıdalaný múmkindigi jáne osy tulǵa jasaǵan zańsyz áreketter týraly shaǵymnyń dálelderi tıisinshe jasalǵan satyp alý-satý mámilesi boıynsha jaýapkerdi talap qoıýshynyń aldyndaǵy mindettemelerdi oryndaýdan bosatý úshin negiz bola almaıdy. Alqanyń qaýlysymen birinshi satydaǵy sottyń sheshimi ózgerissiz, jaýapkerdiń apellıatsııalyq shaǵymy qanaǵattandyrýsyz qaldyryldy», - dep habarlady Pavlodar oblystyq sotynyń baspasóz qyzmetinen.
Azamattyq kodekstiń 440-babyna súıensek, aldyn ala tólenetin aqy somasyn alǵan satýshy óziniń taýar berý jónindegi mindetin belgilengen merzimde (AK 409-baby) oryndamaǵan jaǵdaılarda satyp alýshy odan aqy tólengen taýardy berýdi nemese satýshy bermegen taýar úshin aldyn ala tólengen aqy somasyn qaıtarýdy talap etýge quqyly.
Qaýly zańdy kúshine endi.
Eske sala keteıik, Elordada joq páterdi jalǵa berýmen aınalysqan alaıaq ustaldy.
