Pavlodarda Abylaı han zamanynyń jádigerleri tanystyryldy
PAVLODAR. KAZINFORM - Oblystyq Buqar jyraý atyndaǵy ádebıet jáne óner mýzeıinde Abylaı han zamanyna qatysty jádigerler tanystyryldy. Jurtshylyq kóshpeli kórmeden Abylaı han rezıdentsııasynyń maketin, Abylaıdyń mór saqınasy men sol zamanda batyrlar ustaǵan soǵys qarýlary men saýyt-saımandy, dýlyǵalardy tamashalady.
Soltústik Qazaqstan oblysyndaǵy «Abylaı han rezıdentsııasy mýzeı kesheninde» uly hannyń zamanyna qatysty kóptegen tarıhı jádigerler saqtalǵan. Azattyq kúrestiń jalyndy basshysy, qazaqqa uly han bop ótken Abylaı hannyń muralary Ertistiń Pavlodar óńirinde alǵash ret pash etildi.
Kóshpeli kórmeni bastap kelgen «Abylaı han rezıdentsııasy mýzeı kesheniniń» dırektory Aıan Sadaev mekemede jalpy sany 500-den astam jádiger baryn jetkizdi.
«Abylaı zamanyna qatysty soǵys qarý-jaraǵy, tarıhı qujattar, etnografııalyq buıymdar kóp. Búgingi kóshpeli kórmege solardyń negizgilerin ǵana ákelip otyrmyz. Bul jádigerlerdiń kóbi sol zamannyń úlgisimen jańadan jasalǵan buıymdar ekenin baıqap otyrǵan bolarsyzdar. Qalamyzda Vıktor Javoronkov esimdi sheber azamat bar. Oǵan tapsyrys beremiz. Usta buıymdy jasamas buryn onyń tarıhı negizin zerttep, maǵlumattar jınaıdy. Nátıjesinde óte keremet týyndylar jasap shyǵardy. Al keıbir jádigerlerdi «Mýzeıge syılyq» aktsııasy aıasynda jergilikti jurtshylyq mýzeıge ákelip tapsyrdy», deıdi ol.
Kórmede Abylaıdyń aq úıiniń úlgisi, hannyń mór saqınasynyń kóshirmesi, zulpyqar qylysh, qazaq batyrlarynyń saýyt-saımany men semser, naıza, shoqpar, qylysh, aıbalta, kúrzi, akınak, sıraqty myltyq sııaqty soǵys quraldary, sol kezeńdegi dıplomatııalyq hattar men arhıvtik qujattardyń kóshirmeleri jáne taǵy da basqa kóptegen jádigerler usynyldy.
