Pavlodarda abattandyrý jumysyn ýaqytynda aıaqtamaǵan kásipkerge aıyppul salyndy

PAVLODAR. QazAqparat - Pavlodar qalasy N.Nazarbaev dańǵyly boıyndaǵy Toraıǵyrov - Qaıyrbaev kósheleriniń shekarasynda qazylǵan jer qaıta jóndeýden ótpegen. Bul týraly qalalyq turǵyn úı ınspektsııasy jáne kommýnaldyq sharýashylyq bólimi málimdedi, dep habarlaıdy QazAqparat.

«Bólim ókilderi N.Nazarbaev dańǵylyndaǵy Toraıǵyrov - Qaıyrbaev kósheleriniń shekarasynda ornalasqan ýchaskede merzimi ótken ruqsat qujattarymen jer jumystaryn júrgizý faktisin tirkedi. Buzylǵan abattandyrý elementteri de merziminde qalpyna keltirilmegen», - delingen habarlamada.

Oqıǵa ornyna qalalyq PB JPQ organdary shaqyryldy. Osyǵan baılanysty zańdy tulǵaǵa qatysty QR ÁQBtK-niń 505-babyna sáıkes eskertýlerdi joıýǵa májbúrleý ákimshilik hattamasy toltyryldy. Sonymen qatar 92 myń teńge kólemindegi aıyppul salyndy.

Foto: instagram.com/zhil.inspektsiya