Pavlodarda 60 myńnan astam adam múlik salyǵyn tólemegen

PAVLODAR. KAZINFORM — Pavlodar oblysynyń 60 myńnan astam turǵyny múlik salyǵyn tólemeı otyr. Olardyń qazynaǵa jalpy bereshegi 35 mln teńgeden asady.

Turǵyndardyń salyq organdary aldyndaǵy bereshegin óteýge 1 qazanǵa deıin ýaqyt bar. Ol ýaqyttan asyp ketse, is jeke sot oryndaýshylaryna jetip, ósimpuldar paıda bolatynyn salyqshylar eskertedi.

— Bizdiń oblysymyzdyń 60 myńnan astam turǵynynda múlik salyǵy boıynsha 35 mln teńgeden asatyn bereshekteri bar. Jeke tulǵalardyń ıeligindegi múlikter boıynsha 2023 jyl úshin jalpy salyq 330 mln teńgeni qurady. Múliktiń birneshe ıesi bar bolsa, bir adam tólese salyǵy esepteledi. Ótken aptadan bastap qaǵaz túbirtekterdi mekenjaılarǵa jetkizý jumystary júrip jatyr, -dep habarlady óńirlik memlekettik kirister departamenti túsindirý jumysy jáne baılanys ortalyǵy basqarmasynyń bas mamany Mırgúl Májimova.

Salyqtyń bar-joǵyn, somasyn mobıldi qosymshalardan tekserip, tóleýge bolady. Múlik salyǵy 1 qazanǵa deıin ótelmegen jaǵdaıda, salyq qana emes onyń ósimpuldaryn tóleý kerektigin umytpańyz. Salyq tólemegender bank qyzmetterin ala almaıdy. Al, salyq buıryǵy shyqqannan keıin shetelge shyǵýǵa bolmaıdy. Sondyqtan erterek qamdanǵan jón.

Eske sala keteıik, Jańa Salyq kodeksine saı mindetti tólemderdiń sany qysqaratynyn jazǵan bolatynbyz.