Pavlodarda 50 adamdy aldap soqqan alaıaq ustaldy

PAVLODAR. QazAqparat – Pavlodarda 50 adamnan aldap aqsha alǵan alaıaq qolǵa tústi. Oǵan sengen adamdar 10-200 myń teńge aralyǵynda aqsha aýdarǵan, dep habarlaıdy QazAqparat Pavlodarnews.kz-ke silteme jasap.

Bul týraly Pavlodar oblystyq polıtsııa departamenti málimetine qaraǵanda, Jambyl oblysynyń turǵyny Instagram jelisinde jalǵan esimmen paraqsha ashyp, ózin qyz retinde tanystyrǵan.

«Ol aqshany ınvestıtsııalyq jobalarǵa salý arqyly qysqa merzimde iri tabystar tabýdy usynǵan. Jobany aınalymǵa engizý úshin er adam qarajatty «1Xbet» býkmekerlik keńsesindegi shotyna aýdarýdy suraǵan», - dedi polıtsııa departamenti basshysynyń orynbasary Rashad Óteýov.

Polıtsııa búgingi kúni alaıaqtyq jasaǵan kúdiktiniń qolynan respýblıka boıynsha 50 adam zardap shekkenin atap ótti. Jábirlenýshiler 10-nan 200 myń teńgege deıin aqsha salǵan. Aldanǵandardyń ishinde alǵashqylardyń biri Pavlodar oblysynyń turǵyny bolyp shyqty. Kúdikti anyqtalyp, ustaldy.
Atalǵan faktiler boıynsha Qazaqstan Respýblıkasy QK-niń 190-baby 2-tarmaǵynyń 4-bóligi boıynsha sotqa deıingi tergeý júrgizilýde.