Pavlodarda 18 myń balaǵa qosymsha bilim beretin ortalyq ashyldy
PAVLODAR. KAZINFORM — Pavlodarda «Altyn saqa» qosymsha bilim berý ortalyǵy ashyldy. Jalpy sany 18 myń balany qamtýǵa arnalǵan uıymda IT-stýdııa, robototehnıka úıirmeleri, shyǵarmashylyq, sporttyq jáne mýzykalyq baǵyttaǵy sektsııalar jumys isteıtin bolady.
Balalarǵa arnalǵan zamanaýı ortalyq buryn-sońdy qosymsha bilim berý nysandary bolmaǵan Ekinshi Pavlodar shaǵyn aýdanynda ashyldy.
Óńir basshysy Asaıyn Baıhanov shaǵyn aýdannyń jas turǵyndaryn kópten kútken qýanyshpen quttyqtady.
— Ekinshi Pavlodar turǵyndarymen kezdesýlerdiń birinde biz osy shaǵyn aýdanda balalarǵa arnalǵan zamanaýı mekeme ashýǵa ýáde bergen edik. Búgin óz ýádemizdi oryndap, «Altyn saqa» atty jańa ınnovatsııalyq-shyǵarmashylyq ortalyqty ashyp jatqanymyzǵa qýanyshtymyn. Bul jańa dostar tabýǵa, bilim alýǵa jáne bos ýaqyttaryńyzdy tıimdi ótkizýge bolatyn ekinshi úılerińiz bolsyn, — dedi aımaq basshysy.
«Altyn saqa» ınnovatsııalyq ortalyǵy atalǵan aýmaqta turatyn 18 myń balaǵa arnalǵan qosymsha bilim berýdiń zamanaýı formaty retinde oqýshylardyń qyzyǵýshylyqtary men talanttaryn ashýǵa úlken múmkindikter beredi. Munda IT-stýdııa, robototehnıka úıirmeleri, shyǵarmashylyq, sporttyq jáne mýzykalyq baǵyttaǵy sektsııalar jumys isteıtin bolady. Balalar tamaq ishetin býfet qarastyrylǵan. Qolóner sheberhanalarynda ustalyq ónerge jáne tigin tigýge úıretedi.
Osylaısha Kereký óńirinde Memleket basshysynyń tapsyrmasy boıynsha urpaqtyń úılesimdi damýy úshin barlyq jaǵdaılar jasalýda. Buǵan deıin 800 balaǵa arnalǵan shyǵarmashylyq ortalyǵyn ashý úshin Ertis aýdanyndaǵy qaraýsyz qalǵan ákimshilik ǵımarat qaıta jańartylǵan bolatyn. Qazan aıynda Ekibastuz qalasynda «Samǵaý» balalar shyǵarmashylyǵynyń jańa ortalyǵyn ashý josparlanyp otyr. Sonymen qatar, aldaǵy úsh jylda Ýspen, Sharbaqty jáne Pavlodar aýdandarynda da óner mektepterin salý josparǵan engen.
Eske sala keteıik, Pavlodarda kolledj stýdenti oqytýshyǵa pyshaq jaraqatyn saldy.
