Pavlodarda 144 otbasy baspanaly boldy
Úılerdiń birinde 36 eki jáne úsh bólmeli páterler bolsa, ekinshisinde 10 bir bólmeli, 27 eki bólmeli jáne 35 úsh bólmeli páter bar. Bir sharshy metri 165 myń teńgeni quraıdy. Oblys ákimi Bolat Baqaýov jańa qonys ıelerin merekemen quttyqtap, turǵyn úı qurylys jınaq bankiniń salymshylaryna páter kiltterin tabys etti.
«Bizdiń memlekettiń basty saıasaty - halyqtyń ál-aýqatyn arttyrý, Úıi bardyń kúıi bar» dep halyq danalyǵynda beker aıtylmaǵan. Qazaq halqy shańyraǵyna árqashan úlken mán bergen. Baspana kredıttik turǵyn úıdi júzege asyrý boıynsha «Turǵyn úı qurylys jınaq banki» AQ men «Pavlodar» áleýmettik kásipkerlik korporatsııasy arasyndaǵy birlesken kelisim aıasynda usynylyp otyr. Búgin qala ortalyǵyndaǵy úıdiń kiltterin alasyzdar. Saıabaqta bir mezette 1000 adam kele alatyn úlken akvapark salynyp jatqany belgili. Sport mektebiniń aýmaǵy abattandyrylady, avtoturaq keńeıtiledi. Ár otbasyna bereke-baılyq pen baqytty ómir tileımin!», - dep atap ótti oblys ákimi.
Atalǵan úıdiń 20 páteri Pavlodar munaı-hımııa zaýytynyń qyzmetkerlerine, qalǵan úsh bólmeli páterler «Óz úıim» jobasy boıynsha «TJQB» AQ arqyly berildi. Óz kezeginde PMHZ áleýmettik jaýapkershilik aıasynda óz jumyskerlerine turǵyn úı sertıfıkattaryn tabys etedi. Oblystyq qorǵanys basqarmasy jınaqtaý bóliminiń bastyǵy Qýat Qusbekov úsh bólmeli páterge ıe boldy.
«Buǵan deıin 16 jyl boıy jaldamaly úıde turyp keldik. Ony Qorǵanys mınıstrligi tólep berip otyrǵan. Biraq óz úıimizdeı bolmady. Jambyl oblysynan kelgenmin. Úsh ul men úsh qyzymyz bar. Balalar Qazaqstannyń kóptegen qalalaryndaǵy mektepterde oqydy. Tórt jyl boıy esepshotta qarjy jınap, búgin baspanaly bolyp otyrmyn»,- deıdi áskerı qyzmetshi.
Baspanasyz júrgen azamattar úshin bul bank arqyly páter alý óte tıimdi. 2015 jyldan bastap turǵyn úı qurylys jınaq bankinde esepshot ashqan Aısulý Jaǵyparova ul bala týǵannan keıin úıdi keńeıtý týraly sheshim qabyldaǵan. «Búgin úsh bólmeli páterdiń kiltine ıe boldyq», - deıdi ol. «Alǵashqy jarna 20 paıyzdy qurady. 15 jylǵa alyp otyrmyz. Kolledjde oqytýshy bolyp jumys isteımin. Bes adam turamyz».
Aıta keterligi, oblysta jyl basynan beri «TQJB» AQ-nyń 1355 salymshysy óz baspanasyna qol jetkizgen. Sondaı-aq, 7000 turǵyn bıylǵy jyly esepshot ashyp, aldaǵy ýaqytta qonys toıyn atap ótpek.
