Pavlodarda 144 adam baspanaly boldy
Akademık Shókın, 164/2 jáne 164/3 mekenjaıynda boı kótergen úıler «Nurly jol» baǵdarlamasy aıasynda salyndy. Barlyǵy - 144 páter. Páter ıeleri – «Turǵyn úı qurylys jınaq bankiniń» salymshylary.
Pavlodar ákimi Qaırat Núkenov baspana ıelerin qonys toılarymen quttyqtap, otbasylaryna qut-bereke tiledi. - Elimizdegi karantın rejımine qaramastan, turǵyn úı qurylysy toqtaǵan joq, - dedi Qaırat Núkenov. – Jańa úıler boı kóterip, «Saryarqa» móltekaýdany abattandyrylýda. Búgin bárimiz úshin aıtýly mereke. Osy oraıda sizderge tek jaqsylyqtar tileımin. Otbasylaryńyz aman, jurtymyz tynysh bolsyn. Qonys toılaryńyz qutty bolsyn.
Shahar ákimi karantın rejımi kezinde kúni-túni jumys istegen qurylysshylarǵa qala basshylyǵy men páter ıeleri atynan zor alǵysyn bildirdi. Bankte 3 jyldan astam ýaqyt qarajat jınaǵan Dınara Podýstova búgin úsh bólmeli páterdiń ıesi atandy. - Bul úıde qyzymmen birge turatyn bolamyn, - deıdi Dınara Podýstova. – Aýdan óte kórikti. Nesıelendirý talaptary da kóńil kónshiterlik. 15 jyl boıy aı saıyn 82 myń teńge tóleımin.
Aıta keteıik, 2019 jyly Pavlodarda 200 myń sharshy metr baspana nemese 407 páter paıdalanýǵa berildi.
