Pavlodarda 12 jastaǵy oqýshy qyz dúnıege sábı ákeldi

ASTANA. KAZINFORM — Pavlodar perınataldyq ortalyǵynda kámeletke tolmaǵan qyz bosandy. Bul jaǵdaıǵa aýdandyq bilim bólimi túsinik berip, bala quqyqtary jónindegi ýákil de aralasty.

Sharbaqty aýdandyq bilim bóliminiń habarlaýynsha, qyzdyń jasy 12-de. Tamyz aıynda 13 jasqa tolýy tıis. Oqýshy qyzdyń júkti ekenin muǵalimderi de baıqaǵan.

– Muǵalimderi demalystan shyqqan soń baıqaǵan. Qyz ben onyń anasy dereý aýrýhanaǵa jetkizildi, - dep habarlady bilim basqarmasy.

Basqarma aýyl mektebi dırektorynyń qyzmetinen bosatylǵanyn habarlady. Aýdandyq bilim bóliminiń basshysyna qatań sógis jarııalandy.

Mektep oqýshysy osy demalys kúnderi qyz balany dúnıege ákeldi.

Qylmystyq is qozǵalyp, tergeý júrip jatyr.

Jaǵdaıǵa óńirdegi balalar ombýdsmeni Sáýle Shákenova aralasty.

– Oqıǵa bıylǵy sáýir aıynda Pavlodar oblysyndaǵy aýdandardyń birinde boldy. Muǵalimder demalystan kelgen oqýshynyń ishi shyǵyp júrgenin baıqaǵan. Kóp uzamaı júkti ekeni belgili bolady. Balanyń boljamdy ákesi de kámeletke tolmaǵan, qazirgi tańda QR Qylmystyq kodeksiniń 120-baby (zorlaý) boıynsha qylmystyq is qozǵaldy. Qyz bul jaqqa jańadan kóship kelgen. Ókinishke qaraı, onyń ózin qalaı sezinetinin, psıhologııalyq jáne fızıkalyq jaǵdaıy qandaı ekenin ázirge aıta almaımyn, óıtkeni men qyzdy jeke kórmedim jáne bul týraly aqparat quraldarynan bildim, - dedi Sáýle Shákeneva.

Polıtsııa departamenti bul faktige qatysty ázirge túsinik bergen joq. Densaýlyq saqtaý basqarmasy jasóspirimniń qazirgi jaǵdaıy týraly keıinirek habarlaýǵa ýáde berdi.