Pavlodar óńiriniń aýyldary sapaly aýyzsýmen qanshalyqty qamtylǵan
PAVLODAR. KAZINFORM - Oblys boıynsha 352 aýyldyq eldi mekenniń 232-si ǵana ortalyqtandyrylǵan aýyzsýǵa qosylǵan.
Ertis-Baıan jeriniń aýyldarynda aýyzsý tarıfi árkelki. Sońǵy jasalǵan taldaý qorytyndysy boıynsha Ýspen aýdanynda aýyzsýdyń eń arzan tarıfi tirkelgen – tekshe metri - 51,78 teńge. Al eń qymbaty Aqsý qalasynyń aýyldyq aımaǵynda, tekshe metrine bekitilgen tarıf – 343,6 teńge.
- Barlyǵy 352 aýyldyq eldi meken bar bolsa, onyń ishinde 232 aýyl ortalyqtandyrylǵan aýyzsýmen qamtylǵan. Oblys boıynsha aýyzsýdyń ortasha tarıfi 185,5 teńgeni quraıdy. 92 aýylda keshendi blok-modýlder ornatylǵan jáne 4 eldi mekende toptyq sý qubyrynan baǵanalar bar. Qalǵan 24 aýyl uńǵymalardaǵy sýdy paıdalanyp otyr, - dep habarlady Pavlodar oblysy energetıka jáne turǵyn úı-kommýnaldyq sharýashylyq basqarmasynan.
Bıyl aýyldyq jerlerde 32 ınvestıtsııalyq joba júzege asyrylyp jatyr. Basym baǵyttar - joldardy jáne sýmen jabdyqtaý nysandaryn salý. Jyl sońyna deıin 6 sý qubyrynyń qurylysy aıaqtalyp, oblystaǵy aýyl halqyn 100 % taza aýyzsýmen qamtý josparlanǵan.
Al oblystyq sanıtarııalyq-epıdemıologııalyq baqylaý departamentiniń málimetinshe, byltyr ortalyqtandyrylǵan jáne oqshaýlanǵan aýyzsý kózderinen 1559 synama alynyp, onyń 62-sinde mıkrobıologııalyq jáne sanıtarlyq-hımııalyq kórsetkishter normaǵa saı bolmaı shyqqan. Departament mamandary aýdan-qalalardyń ákimderine jáne aýyzsýmen qamtý mekemelerine sý qubyrlaryn únemi shaıyp, súzgilerdi aýystyryp otyrý kerektigin eskertedi.
Eske sala keteıik, elimizde aýyzsýdy esepteýdiń jańa ádistemesi bekitildi.