Pavlodar oblysynyń ákimi Baıanaýylda aspan astyndaǵy murajaı ashý ıdeıasyn qoldady

ASTANA. QazAqparat - Baıanaýylda ótken ekspedıtsııadan keıin Bolat Baqaýov «Týǵan jer» baǵdarlamasyn júzege asyrý boıynsha jańadan qurylǵan jumys tobyna ulttyq parkte ornalasqan tarıhı jáne arheologııalyq oryndardy abattandyrý boıynsha jospar qurýdy tapsyrdy, dep habarlaıdy pavlodarnews.kz .

Baıanaýylǵa jasaǵan jumys saparynan keıin aımaq basshysy jınalys ótkizip, aýdannyń tarıhı-mádenı murasyn saqtaý týraly másele kóterdi. - Tabıǵaty kórkem, tarıhı qunydylyǵy asa mańyzdy jerge ıelik etip otyrǵandyqtan, ony qaz-qalpynda saqtaýymyz kerek, - dedi oblys ákimi. - Baıanaýylǵa kelgen qonaqtar taýda serýendep, kólde shomylyp qana qoımaı, ólkeniń baı tarıhy men mádenıetimen tanysýy úshin týrısterdiń aýdandaǵy rýhanı oryndardy aralaýyna jaǵdaı jasaýymyz kerek. Sonda ǵana Baıanaýyl brendke aınalady. Bolat Baqaýov Baıanaýyldyń mańyzdy tarıhı jáne arheologııalyq oryndaryn abattandyryp, qorshap, úsh tildegi aqparattyq qalqandarmen jabdyqtaý qajet ekendigin aıtty. Budan bólek, ol jerlerge joldar jasap, arnaıy kórsetkishter ornatý kerek.

Esterińizge sala keteıik, ótken demalysta Baıanaýylda jańa týrıstik marshrýttyń tusaýkeseri ótken edi. Marshrýttyń boıynda jaıaý jáne at ústindegi ekskýrsııalar uıymdastyrylyp, qazaqtyń tuńǵysh kınorejısseri Sháken Aımanovtyń týǵan jeri, Abylaı hannyń ordasy, Danatas jáne Kempirtas jartastary, halyq arasynda «Baıanaýyldyq stoýnhendj» atanyp ketken «Murtty qorǵan» arheologııalyq eskertkishi, qola dáýiriniń qorymdary jáne basqa da oryndarǵa saparlaýǵa bolady.