Pavlodar oblysynda UBT-ǵa aqsha jınaǵan ákimdik sheneýnigi qyzmetinen ketti

PAVLODAR. QazAqparat – UBT ezinde mektep dırektorlarynan aqsha jınaǵan Pavlodar oblysy Baıanaýyl aýdany ákiminiń orynbasary alyp otyrǵan laýazymynan bosatylyp, akademık Q. I. Sátbaevtyń Baıanaýyl memorıaldyq murajaıyna dırektor bolyp taǵaıyndaldy, dep habarlaıdy QazAqparat pavlodarnews.kz saıtyna silteme jasap.

Portaldyń jazýynsha, Buǵan deıin Baıanaýyl aýdany ákiminiń orynbasary Baqyt Toqjigitova UBT-ǵa durys jaýaptardy alyp ótý múmkindigi jáne baqylaýdy azaıtý úshin QR BǴM Ulttyq testileý ortalyǵynyń ókilderine aqsha jınap berý týraly aýdandyq mektepterdiń 20 dırektoryna tapsyrma bergeni úshin jazalanǵan. Toqjigitova 3,4 mln teńge jınap berý jóninde BǴM ókilderimen kelisimge kele almaǵan. Nátıjesinde mektep dırektorlaryna aqshalary qaıtarylǵan.

2018 jylǵy 5 maýsymda atalǵan fakti Sotqa deıingi tergep-tekserýdiń biryńǵaı tizilimine QR QK-iń 366-baby 2-bóligi (qomaqty kólemde para alý) boıynsha tirkeldi. Al eki kún ótkennen keıin laýazymdy tulǵalardyń áreketi QR QK-niń 361-baby 2-bóligine (laýazymdyq ókilettigin teris paıdalaný) aýystyryldy.

Aǵymdaǵy jyldyń aqpan aıynda Toqjigitovanyń is-áreketinde qylmystyq quqyqbuzýshylyqtyń bar ekendigi dáleldenbeýine baılanysty qylmystyq is toqtatyldy. Budan keıin bul ispen Ádep jónindegi keńes aınalysyp, qorytyndysynda aýdan ákiminiń orynbasaryna «qyzmetine tolyq sáıkes kelmeıtini týraly» tártiptik jaza qoldaný usynyldy.

Aýdan ákimdiginiń habarlaýynsha, Baqyt Toqjigitova aýdan ákiminiń orynbasary qyzmetinen bosatylǵan. Búginde ol akademık Q. I. Sátbaevtyń Baıanaýyl memorıaldyq murajaıynyń basshysy bolyp taǵaıyndaldy.

«Ol óz erkimen jumystan bosatyldy. 24 maýsymnan bastap aýdan ákiminiń orynbasary bolyp Qanat Kárimov taǵaıyndaldy. Onyń sońǵy jumys orny – «Pavlodar oblysynyń memlekettik muraǵaty» KMM basshysynyń orynbasary», - dep naqtylady aýdan ákimdiginen.

Qanat Kárimov 1964 jyly 26 tamyzda Baıanaýyl aýylynda dúnıege kelgen. Bilimi – joǵary. 1986 jyly Abaı atyndaǵy Qazaq ulttyq pedagogıkalyq ýnıversıtetin «Tarıh, qoǵamtaný jáne keńes quqyǵy» mamandyǵy boıynsha bitirgen.