Pavlodar oblysynda oqýshylar UBT-ǵa ákimderdiń kólikterimen jetkiziledi
«Ártúrli jaǵdaılar bolady. Tipti, balany aýdan ortalyǵyna jetkizetin kólik tabylmaı qalady. Búginde aýyldarda eki-úsh túlekten ǵana bar. Sondyqtan aýyldyq aımaqtardyń ákimderi balalardy testileý ortalyǵyna jetkizý úshin ózderiniń kólikterin berýi kerek»,- dedi aımaq basshysy oblys ákimdiginde ótken keńeıtilgen otyrysta.
Oblystyq bilim berý basqarmasynyń basshysy Dinıslam Bolathanulynyń aıtýynsha, 796 túlekti turǵylyqty jerine jáne UBT ótkizý oryndaryna tasymaldaý josparlanýda. Bul maqsatta 24 mektep avtobýsy men 33 avtokólik jumyldyrylady. Tamaqtandyrý, jatyn oryn jáne tasymaldaýǵa aýdandyq jáne qalalyq bıýdjetterde 7,6 mln teńge qarastyrylǵan. Ornalastyrý oryndarynda jatyn bólmeleri men ashanalarǵa jóndeý júrgiziledi. 10 aýdannyń beseýinde - Sharbaqty, Pavlodar, Ýspen, Lebıaji, Maı aýdandarynda testileý pýnkteri joq. Bul aýdandardyń túlekteri men qalalardyń aýyldyq aımaqtary UBT-ny Pavlodar, Aqsý, Ekibastuz qalalarynyń UBT ótkizý pýnkti bazasynda tapsyrady.
Sharbaqty, Lebıaji jáne Pavlodar aýdandary mektepteriniń túlekteri - PMPÝ, Ýspen aýdany - S.Toraıǵyrov atyndaǵy PMÝ, Maı aýdany Aqsý qalasynda tapsyrady. Baıanaýyl, Aqtoǵaı, Ertis, Kachır, Jelezın aýdandary, Aqsý qalasynyń qalalyq jáne aýyl mektepteriniń bitirýshileri óz aýdandarynda ótkizedi. - Búgingi kúni UBT ótkizýdiń keıbir pýnktterinde Kachır jáne Jelezın bóliginde ótkizýge qatysty másele tur, - dedi Dinıslam Bolathanuly. - Jelezın aýdanynyń kóptegen eldi mekenderi aýdan ortalyǵynan alys qashyqtyqta ornalasqan. Sondyqtan UBT-ny Jelezın aýylynda ótkizgen jón. 2018 jylǵy 20-sáýirdegi jaǵdaı boıynsha bıyl mektepterde 11-synypta 3896 oqýshy bilim alýda. Olardyń 2804-i nemese 72%-y UBT-ǵa qatysýdy josparlaýda.
Oblys ákimi óziniń orynbasary Meıram Begentaevqa testileý pýnktterine túlekterdi jetkizý kezinde jol polıtsııasynyń ilesip júrýi men qoǵamdyq tártipti saqtaýdy jáne ornalasatyn jerde órtke qarsy qaýipsizdikti qamtamasyz etýdi tapsyrdy.
