Pavlodar oblysynda esirtki graffıtıimen kúresip jatyr

PAVLODAR. QazAqparat – Óńirlik polıtsııa departamenti «Nur Otan» partııasynyń jáne qalalyq ákimdikterdiń qoldaýymen Pavlodar, Ekibastuz jáne Aqsý qalalarynda zańsyz esirtki quraldarynyń jarnamasyna qarsy reıd uıymdastyryldy, dep habarlaıdy QazAqparat Pavlodarnews.kz-ke silteme jasap.

Pavlodar oblystyq polıtsııa departamenti baspasóz qyzmetiniń málimetinshe, sharaǵa «VITA» erikti-izdestirý jasaǵynyń, «Nur Otan» partııasynyń «Jas Otan» jastar qanatynyń, Jastar bastamalaryn damytý ortalyǵynyń, «Qyzyl Jarty Aı» QB, «Jasyl el» jastar stýdenttik jasaǵynyń jáne «New Life PLUS» QQ eriktileri qatysty.

«Іs-shara esirtki qylmysyn aldyn alýǵa baǵyttalǵan. Oǵan eriktiler men oblystyń belsendi turǵyndary kómektesip jatyr. Esirtki graffıtıi beınelengen úılerdiń qabyrǵasyn sándeý úshin trafaretpen mysyqtyń sýretin salyp shyqtyq», - dedi Pavlodar oblystyq polıtsııa departamenti esirtki qylmysyna qarsy kúres basqarmasynyń bólim bastyǵy Irına Temirǵalıeva.

Aıta keteıik, oblys ortalyǵynda «Pavlodar – esirtkisiz qala» qoǵamdyq bastamasy júzege asyp jatyr. Onyń quramyna quqyq qorǵaý organdary men memlekettik organ ókilderi, eriktiler, úkimettik emes uıymdar, bıznes-sektor ókilderi men belsendi oblys turǵyndary kirdi.

Polıtsııa departamentiniń baspasóz qyzmeti osyndaı zań buzýshylyqtyń kýási bolsańyz, 102 nemese 8 [phone] nómirine baılanysýdy nemese «Police 102» uıaly qosymshasyn paıdalanýdy suraıdy.