Pavlodar oblysynda eki poıyz soqtyǵysty

PAVLODAR. QazAqparat - Pavlodar oblysyndaǵy Tranzıtnaıa stansasynda 14 vagonnan quralǵan júk poıyzy basqa bir qurammen soqtyǵysty, dep habarlaıdy «QazAqparat» HAA tilshisi.

«18 qańtar kúni 06:45-te Pavlodar oblysyndaǵy Tranzıtnaıa stansasynda, «Bogatyr Trans» JShS kirme jolynda 14 vagonnan quralǵan júk poıyzy turaqtan jyljyp, basqa qurammen soqtyǵysty. Sonyń saldarynan bir quramdaǵy 3 vagon aýdaryldy, ekinshi quramnyń 4 vagony relsten shyǵyp ketti», - deıdi «QTJ Júk tasymaly» AQ baspasóz qyzmetindegiler.

Aldyn ala málimetterge qaraǵanda, oqys oqıǵaǵa túıisý jelisindegi kerneýdiń joǵalýy sebep bolǵan. Lokomotıvter, kirme jol jáne lokomotıv brıgadalary «Bogatyr Trans» JShS-ǵa qarasty.

Oqıǵanyń mán-jaıy tekserilip jatyr. Ázirge qylmystyq is qozǵalǵan joq.