Pavlodar oblysynda «Altyn belgige» úmitkerlerdiń 99,5 paıyzy úmitti aqtady

PAVLODAR. QazAqparat - Bıyl Pavlodar oblysynda 209 «Altyn belgi» úmitkerleriniń 208-i nemese 99,5 paıyzy óz bilimin rastady. Bul týraly óńirlik kommýnıkatsııalar qyzmetinde ótken jıynda bilim berý basqarmasynyń basshysy Dinıslam Bolathanuly málim etti dep habarlaıdy pavlodarnews.kz.

 «Qorytyndy attestattaý - 11 jyl boıy mektepte  alǵan bilimniń nátıjesi», - dedi  Dinıslam Bolathanuly. - UBT tek  joǵary oqý oryndaryna túsý úshin tapsyratyn emtıhan  bolyp tabylady. Sońǵy eki jylda búkil qorytyndy emtıhandar tek qana mektep qabyrǵasynda ótetini belgili jáne «Altyn belgi»  de  emtıhan nátıjesi boıynsha beriledi.      Oblys mektepterinde 11 synyp oqýshylarynyń emtıhany 29 mamyr - 9 maýsym aralyǵynda ótti. Bıyl mektepti 3897 oqýshy bitirdi. Onyń ishinde qazaq tilinde bilim alǵandar sany - 1964, orys tilinde - 1933. Úzdik attestatqa úmitker 107 oqýshynyń barlyǵy óz bilimderin rastady». 

    Oblystyq bilim berý basqarmasy usynǵan aqparatqa súıensek, qorytyndy attestattaýdan bilim berý basqarmasynyń buıryǵymen  79 oqýshynyń 76-sy densaýlyǵyna  jáne  QR qurama komandasyna úmitker úsh túlek  oqý-jattyǵýlarǵa baılanysty emtıhannan bosatylǵan. - Bilim berý grantyn taǵaıyndaý kezinde  «Altyn belgi» ıegerleri joǵary oqý ornyna túsý úshin mindetti túrde UBT tapsyrady, - dedi Dinıslam Bolathanuly.

 Sondaı-aq  buryn granttardy taǵaıyndaý  kezinde «Altyn belgi» ıegeri qansha ball jınasa da  birden basymdyq quqyqqa ıe bolatyn. Bıylǵy jyldan bastap,  tek qana birdeı  ball  jınaǵan jaǵdaıda «Altyn belgi» ıegerleri  grantqa qol jetkize alady. 11 jyl boıy  alǵan bilimin sarapqa  salatyn sátte túrli jaǵdaılarǵa  baılanysty UBT nátıjesinde úmitkerler óz «Altyn belgisin» dáleldeı  almaıtyn kezder boldy. Sondyqtan mınıstrliktiń sheshimimen  balalarǵa qara shańyraǵynda emtıhan tapsyrý týraly sheshim qabyldandy jáne bul quptarlyq oı.