Pavlodar oblysynyń ákimi Aıdos Shaımerdenniń otbasyna kóńil aıtty

PAVLODAR. KAZINFORM - Pavlodar oblysynyń ákimi Asaıyn Baıhanov Maıqaıyńda altyn kenishindegi oıyqtan qazyp alynǵan marqum Aıdos Shaımerdenniń otbasyna kóńil aıtty. Al 55 jastaǵy júrgizýshi Aıyp Tileýbergenovtiń denesin qutqarýshylar jaqyn arada tabady dep úmittenetinin jetkizdi.

«Búgin izdestirý jumystary turaqty negizde azdaǵan úzilistermen júrgizilgen «Maıqaıyń-altyn» AQ taý-ken aýdanyndaǵy opyrylǵan jerde izdestirý jumystaryn júrgizý kezinde eki qutqarýshynyń biriniń denesi tabyldy. Pavlodar oblysynyń TJD kúshimen qutqarýshynyń múrdesi jer betine kóterilip, jedel-tergeý tobyna berildi.

Tabylǵan jeton men kıiminen qutqarýshylar vzvody komandıriniń 36 jastaǵy orynbasary Aıdos Shaımerdenniń denesi tabylǵany anyqtaldy.

Aıdostyń ata-anasyna, onyń jubaıy Nursulýǵa, sondaı-aq, týystary men jaqyndaryna kóńil aıtamyn» dep jazdy Pavlodar oblysynyń ákimi Asaıyn Baıhanov telegramdaǵy paraqshasynda.

Oblys ákimi atap ótkendeı, apattyń alǵashqy kúni eki qutqarýshynyń - Sarqyt Berliqan men Oleg Tyshkevıchtiń deneleri tabylǵan bolatyn.

«Ókinishke oraı, 55 jastaǵy júrgizýshi Aıyp Tileýbergenovtiń denesi áli tabylǵan joq. Biz bárimiz jaqyn arada izdestirý jumystary óz nátıjesin beredi dep úmittenemiz», - dedi óńir basshysy.

Eske sala keteıik, arada 6 jarym aı ótkende Maıqaıyńdaǵy altyn kenishinde úshinshi qutqarýshynyń múrdesi tabyldy.

Marqum Aıdos Shaımerdenniń denesi 70 metr tereńdikten qazyp alynǵan.