Pavlodar oblysynda joǵalǵan ańshynyń biriniń máıiti tabyldy

PAVLODAR. KAZINFORM — Pavlodar oblysy TJD qutqarýshylary Ekibastuz aýdanyndaǵy Sholaqsor kólinde joǵalǵan ańshylardyń biriniń denesin tapty. Ekinshisi áli de izdestirilip jatyr. 

10 qazanda eki adam GRES-1 baǵytynda ań aýlaýǵa shyǵyp, qaıtyp oralmaǵan. Olardyń joǵalyp ketkeni týraly habarlama tek 17 qazanda túsken.

— Sol kúni, saǵat 15:29–da, jaǵadan 15 metr qashyqtyqta qutqarýshylar dron men arnaıy jabdyqtyń kómegimen joǵalǵan adamdardyń biri 1973 jyly týǵan er adamnyń denesin taýyp, sýdan shyǵardy. Ekinshi adamdy izdeý jáne qutqarý jumystary jalǵasyp jatyr, — delingen habarlamada.

Oǵan TJD qutqarýshylar, qyzmettik ıtteri bar kınologtar, polıtsııa, JAO, eriktiler jumyldyryldy.

Buǵan deıin habarlanǵandaı, Pavlodarda iz-túzsiz joǵalǵan er adamnyń denesi ózennen tabyldy.