Pavlodar oblysynda týrıster sany 31% artty
ASTANA. KAZINFORM – Pavlodar oblysynda týrıster sany 31% artty. Osyǵan oraı Kazakh Tourism ulttyq kompanııasy óńirdegi týrızm salasy ókilderine arnap oqytý semınaryn ótkizdi, dep habarlaıdy oblystyq sport jáne týrızm basqarmasy.
2025 jyldyń birinshi jartyjyldyǵynda Pavlodar oblysyndaǵy ornalastyrý oryndaryna 129 myńǵa jýyq týrıst toqtady. Bul ótken jyldyń sáıkes kezeńimen salystyrǵanda 31% kóp.
Kórsetkishtiń ósimin eskergen óńirlik dene shynyqtyrý jáne sport basqarmasy men «Atameken» kásipkerler palatasy jergilikti týrıstik bızneske arnap oqý semınaryn uıymdastyrdy.
Shara kásipkerlerdiń biliktiligin arttyrýǵa, týrıstik ónimderdi damytýǵa jáne servıs sapasyn jaqsartýǵa baǵyttaldy. Aýyldyq jáne agrotýrızmde básekege qabiletti qyzmetterdi qalyptastyrýǵa basymdyq berildi.
«Týrıst tartý ǵana emes, olardyń bolýyna qolaıly jaǵdaı jasaý mańyzdy. Óńirdiń bıznesti oqytýǵa kóńil bólýi quptarlyq. Bul turaqty týrıstik ekojúıeni qalyptastyrýǵa yqpal etedi», – dedi «Kazakh Tourism» UK» AQ Basqarma tóraǵasynyń mindetin atqarýshy Danıel Serjanuly.
Semınar barysynda Kazakh Tourism ókilderi agrarlyq jáne aýyldyq týrızmdi damytýdyń keleshegin, týrıstik qyzmetterdi standarttaýdyń joldaryn, «Sapa belgisi» baǵdarlamasyn jáne gıdterdiń jumysyn tsıfrlandyrýdyń mańyzyn túsindirdi. Qatysýshylarǵa aýyldyq jerlerde týrızmdi damytýǵa arnalǵan naqty tájirıbelik keıster usynyldy.
Aıta keteıik, «Sapa belgisi» baǵdarlamasy qonaqjaılylyq mádenıetin arttyrýǵa jáne eldegi týrıstik qyzmetterdiń sapasyn jaqsartýǵa baǵyttalǵan. 2021 jyldan beri 200-den astam kompanııa óz qyzmetin týrızm ındýstrııasy standarttaryna sáıkestendirgen. Baǵdarlama aıasynda týrıstik operatorlar men qonaqúılerge, qoǵamdyq tamaqtaný oryndaryna eki deńgeı boıynsha mártebe beriledi: «Very Nice» jáne «Nice».
Eske salaıyq, buǵan deıin Pavlodar kóshelerinde bet-álpetti tanıtyn beınekameralar ornatylyp jatqany habarlandy.