Pavlodar oblysynda sý tasqyny jaǵdaıy turaqtandy – ákim

ASTANA. KAZINFORM – Pavlodar oblysynda sý tasqynynyń aldyn alý jáne saldaryn joıý is-sharalaryna barlyq kúsh pen qural jumyldyryldy. Bul týraly Pavlodar oblysynyń ákimi Asaıyn Baıhanov málim etti.

«Keshendi jumystardyń nátıjesinde Pavlodar oblysynda sý tasqyny jaǵdaıy turaqtandy. Oblys boıynsha sý tasqynynyń aldyn alý jáne saldaryn joıý is-sharalaryna barlyq kúsh pen qural jumyldyryldy. Atap aıtqanda, 238 adam, 109 birlik tehnıka, 13 motopom tartyldy. Tótenshe jaǵdaılar departamenti jáne jergilikti bılik organdarynyń kúshimen sý tasqynyna qarsy jumys bastalǵaly beri 651 myń tekshe metrden astam erigen sý soryldy jáne 21 140 qap qum men 4 560 tonna ınertti materıaldar tóseldi», - dedi Asaıyn Baıhanov Ortalyq kommýnıkatsııalar qyzmeti alańynda ótken baspasóz máslıhatynda. 

Ákimniń aıtýynsha, Pavlodar oblysy boıynsha sý tasqyny bastalǵaly adam jáne mal shyǵyny tirkelgen joq. 

Sondaı-aq, Asaıyn Baıhanov óńirdegi jedel shtabtyń táýlik boıy jumys istep turǵanyn jáne jaǵdaı jeke baqylaýynda ekenin aıtty. 

Buǵan deıin habarlaǵanymyzdaı Pavlodar oblysynda sý tasqynynan zardap shekkender ótemaqy ala bastady.