Pavlodar oblysynda eki aýdanda jolaýshylar tasymaly nashar qamtylǵan
PAVLODAR. KAZINFORM - Búginde oblys aýmaǵyndaǵy turaqty jolaýshylar tasymaly 114 baǵyt boıynsha júrgiziledi. Baıanaýyl jáne Sharbaqty aýdandarynda bul turǵyda birqatar máseleler bar.
Pavlodar oblysy jolaýshylar kóligi jáne avtomobıl joldary basqarmasynyń dereginshe, qazirgi ýaqytta óńirdegi eldi mekenderdi jalǵaıtyn 114 avtobýs baǵyty bar. Buǵan qosa qalalar ishinde 69 baǵytta qoǵamdyq kólik qyzmet kórsetedi.
— Oblysta jalpy sany 183 avtobýs baǵyty jumys isteıdi. Onyń ishinde 7 halyqaralyq, 5 oblysaralyq, 34 oblysishilik, 68 aýdanishilik jáne 69 qalalyq baǵyttar (onyń ishinde 14-i tramvaı). Bıyl jergilikti bıýdjetten jalpy somasy 5,9 mlrd teńgege 126 avtobýs baǵyty sýbsıdııalanyp otyr. Buǵan qosa Pavlodardaǵy 14 tramvaı baǵytyna 1,5 mlrd teńge berildi, -dedi óńirlik jolaýshylar kóligi jáne avtomobıl joldary basqarmasynyń basshysy Qanat Qashkırov Kazinform tilshisine bergen suhbatynda.
Qalalardy qospaǵanda, aımaqtyń barlyq aýdandarynda avtobýs beketteri bar. Tek keıbir óńirlerde jolaýshylar tasymal boıynsha máseleler qalyptasqan. Sonyń ishinde Baıanaýyl jáne Sharbaqty aýdandarynda jolaýshylar tasymaly nashar qamtylǵan. Bılik ókilderi aldaǵy ýaqytta bul túıtkildi sheshýge árekettenip kórmek.
«Turaqty baǵyttarǵa qyzmet kórsetý quqyǵyna konkýrstar júrgiziledi. Turaqty jumys pen jolaýshylar úshin tarıfterdiń qoljetimdi deńgeıin qamtamasyz etý maqsatynda tasymaldaýshylarǵa sýbsıdııalar tólenedi. Bul másele udaıy nazarda», - dep qosty Q.Qashkırov.
Al oblys ákimi baspasóz qyzmetiniń málimetine súıensek, óńirdegi 345 aýyldyń 308-i jolaýshylar tasymalymen qamtylǵan. Jyl basynan beri qosymsha 4 jańa baǵyt ashylypty. Pavlodar oblysy mektep jasyndaǵy balalardyń qalalyq qoǵamdyq kólikterde tegin jol júrýin qamtamasyz etetin respýblıkadaǵy bes óńirdiń biri. 2023-2024 jyldary Pavlodar jáne Ekibastuz avtokásiporyndary 211 jańa avtobýs satyp aldy. Jyl sońyna deıin Pavlodar qalasyna taǵy 32 jańa avtobýs jetkiziledi dep kútilip otyr.
Sondaı-aq, aldaǵy 2 jyl ishinde Eýropa qaıta qurý jáne damý bankinen alynǵan qarajat arqyly akkýmýlıatorlyq batareıalarmen júretin avtonomdy 25 jańa tramvaı satyp alynady.
Eske sala keteıik, Qazaqstanda temirjol kóligimen tasymaldanatyn shıkizattyq emes eksport kólemi artty.
