Pavlodar oblysynda ámbebap qutqarý bólimshesi ashyldy
PAVLODAR. KAZINFORM — Jańa bólimshe órt sóndirý bólimin, trassalyq-qutqarý pýnktin jáne Apattar medıtsınasy ortalyǵynyń brıgadasyn biriktiredi.
Tótenshe jaǵdaı qyzmeti mamandarynyń pikirinshe, mundaı format órtterge, jol-kólik oqıǵalaryna jáne ózge de tótenshe jaǵdaılarǵa tez arada den qoıýǵa múmkindik beredi.
Aqqýly aýdanyndaǵy «Omby-Maıqapshaǵaı» respýblıkalyq mańyzy bar avtojolynyń boıynda ámbebap qutqarý bólimshesi ashyldy. Pavlodar qalasynan 100 km jerde ornalasqan jańa keshen elimizdegi mundaı úshinshi nysan. Onyń biregeıligi — birneshe shuǵyl qyzmetterdiń birge qyzmet atqarýyna jaǵdaı týdyrýynda. ıAǵnı bir aýmaqta órt sóndirý bólimi, Apattar medıtsınasy ortalyǵynyń trassalyq medıtsınalyq-qutqarý pýnkti toǵysqan. Jaqyn arada munda oblystyq tótenshe jaǵdaılar departamenti jedel-qutqarý jasaǵynyń qyzmetkerleri jumys isteı bastaıdy.
— Mınıstrlik aýyldy jerlerdegi qaýipsizdikti arttyrýǵa baǵyttalǵan «Aýyl qutqarýshylary» baǵdarlamasyn jalǵastyrýda. Mundaı birikken qyzmet ýaqytty qysqartýǵa múmkindik beredi. Tótenshe jaǵdaıdyń sıpatyna qaramastan, ıaǵnı órt, jol-kólik oqıǵasy nemese shuǵyl medıtsınalyq kómek bolsyn, mamandar úılesimdi, jedel jáne tıimdi áreket etedi. Nysandy jańartý bıýdjet qarajatynsyz júzege asyryldy. Órt sóndirýshilerdi, qutqarýshylar men dárigerlerdi bir bazada biriktirý — bul jaı ǵana yńǵaılylyq úshin jasalǵan dúnıe emes. Bul — tótenshe jaǵdaıdan zardap shekkenderge alǵashqy mınýttarda jedel kómek kórsetýdiń naqty múmkindigi. Biz mundaı keshender avtojoldardyń strategııalyq mańyzdy ýchaskelerinde bolýy úshin jumys istep jatyrmyz, - dedi nysannyń ashylý saltanatyna qatysqan QR Tótenshe jaǵdaılar mınıstri Shyńǵys Árinov.
Ortalyqtyń Aqqýly aýdanynda oryn tebýi onyń strategııalyq mańyzdylyǵyn eskere otyryp tańdalǵan. Sebebi ol Pavlodar oblysynyń aýmaǵyn ǵana emes, «Semeı ormanyn» da qamtı alady. Rezervattar men kóliktiń jetýi qıyn ýchaskelerge de kómek kórsetýge múmkindik beredi. Keshen tótenshe jaǵdaı saldaryn joıý úshin qajetti zamanaýı tehnıkamen jáne jabdyqtarmen jaraqtalǵan. Aýmaǵynda zardap shekkenderdi shuǵyl evakýatsııalaý jáne qutqarý toptaryn shalǵaı aýdandarǵa jedel tasymaldaý úshin tikushaq alańy qarastyrylǵan.
Eki qabatty ǵımaratta mamandar táýlik boıy kezekshilik etedi.
Jeke quram úshin qolaıly jaǵdaılar jasalǵan: demalýǵa arnalǵan bólmeler, dýsh bólmeleri, as úı, sondaı-aq arnaıy tehnıkaǵa qyzmet kórsetý úshin tehnıkalyq aımaqtar qarastyrylǵan. Mınıstr atap ótkendeı, buǵan deıin mundaı keshender Aqmola jáne Qaraǵandy oblystarynda paıdalanýǵa berilgen.
Іs-shara sońynda Tótenshe jaǵdaılar mınıstrliginiń basshysy qyzmetkerlerge jańa arnaıy tehnıkanyń kiltterin, Alǵys hattar tabys etti. Sondaı-aq óńirlik departamenttegi birneshe qyzmetkerdiń kásibıligi men adaldyǵyn atap ótip, olarǵa kezekten tys shender berdi.
Eske sala keteıik, Pavlodar — Semeı avtojolynda kólik apatynan júrgizýshi qaza tapty.