Pavlodar halqynyń 84 paıyzy memlekettik tildi meńgergen

PAVLODAR. QazAqparat - Pavlodar oblysynda bıyl 10 myńǵa jýyq adam aǵylshyn tilin úırengen. Óńirde 9760 adam aǵylshyn tilin jáne 3200 adam frantsýz, ıspan, túrik, nemis, koreı tilderin oqyǵan, dep habarlaıdy QazAqparat pavlodarnews.kz-ke silteme jasap.

Oblystyq tilderdi damytý basqarmasynyń basshysy Sáýle Osmanovanyń aıtýynsha, búgingi kúni orys tilin meńgergen turǵyndardyń úlesi - 98,6%, aǵylshyn tilin meńgergen turǵyndardyń úlesi - 23 % jáne úsh - qazaq, orys jáne aǵylshyn tilderin meńgergen turǵyndardyń úlesi 20%-dy quraıdy.

«Óńirlik is-sharalar jospary sheńberinde uıymdastyrylǵan aǵylshyn tili boıynsha memlekettik qyzmetshilerge arnalǵan kýrsty 75 adam aıaqtady, - deıdi Sáýle Osmanova. - Sondaı-aq, ózge etnos ókilderi arasynda arnaıy konkýrstar men sharalar ótkizildi. Onyń ishinde túrki tildes halyqtar jazbalary kúni, «Slavıan jazbalary kúnderi», «Birlik» etnofestıvali, Abaı oqýlary, orys jastary arasynda qazaq tilin jetik meńgergen «Til - parasat», úsh tildi meńgergen jastar arasynda ótetin «Til sheberi» baıqaýlary bar».

Jyl saıyn ótkiziletin áleýmettik zertteýlerdiń qorytyndysyna sáıkes, memlekettik tildi meńgergen turǵyndardyń úlesi byltyrǵy jylmen salystyrǵanda tórt paıyzǵa artyp, 84 %-ǵa jetken. Oblystyq is-sharalar jospary sheńberinde uıymdastyrylǵan qazaq tilin tegin oqytý kýrsyn 304 adam aıaqtaǵan.

Jalpy oblys boıynsha qazaq tili oqytý kýrstaryna 12230 adam qatysqan. Aıta keterligi, aımaqta 35 oqytý ortalyǵy qyzmet etedi. Onyń 11-i - memlekettik tildi, 31-i - aǵylshyn tilin, tórteýi - orys tilin, 13-i - basqa tilderdi oqytýǵa baǵyttalǵan.