Pavlodar fermerleri egiske paıdalanylatyn sýǵa qansha tólep otyr
PAVLODAR. KAZINFORM — Óńirde sýarylatyn jerlerdiń kóbeıýine oraı sý tutyný kólemi de ósip kele jatyr. Mysal úshin 2022 jyly sharýalar 68,8 mln tekshe metr sý paıdalansa, byltyr 76,6 mln tekshe metrge jetken.
Aýyl sharýashylyǵy basqarmasynyń deregine súıensek, oblys boıynsha sýarmaly egistik jerlerdiń kólemi — 191,2 myń gektar. Onyń ishinde 165,7 myń gektary aýyl sharýashylyǵy taýaryn óndirýshilerge bekitilgen. Al sý únemdeý tehnologııalary qoldanylatyn jer kólemi 85,1 myń gektarǵa jetken.
— Bizder fermerlerdiń sýarmaly eginshilikke kóshýge degen umtylystary qýantady. Aımaǵymyzdaǵy Ertis ózeni, Qanysh Sátbaev atyndaǵy kanal jáne jerasty sýlary egin sharýashylyǵy qajettilikteri úshin sýmen jabdyqtaýdyń negizgi kózderi sanalady. Sýarylatyn jerlerdiń kóbeıýine oraı sýdy tutyný kólemi de ósip kele jatqanyn baıqaımyz. Mysal úshin 2022 jyly fermerlerimiz 68,8 mln tekshe metr sý paıdalansa, 2023 jyly ol birden 6 mln tekshe metrge jýyq ulǵaıyp, 74,7 mln tekshe metr bolǵany baıqaldy. Al byltyr 76,6 mln tekshe metrge jetken. Bıylǵy kórsetkish odan da kóp bolatyny aıdan anyq, — dep habarlady Kazinform tilshisine óńirlik aýyl sharýashylyǵy basqarmasynyń basshysy Hamza Orazbekov.
Sý berý qyzmetteriniń tarıfteri de ártúrli. Mamandardyń aıtýynsha, tarıfter jer shalǵaılyǵy men sý jetkizý, kóterý erekshelikterine sáıkes belgilenedi.
«Adıs» JShS 1 tekshe metr sý úshin 16,85 teńge alsa, «Qazsýshar» RMK «Qanysh Sátbaev atyndaǵy kanal» fılıaly 59,82 teńge dep bekitken. Al «Qazsýshar» RMK Pavlodar fılıaly ár tekshe metrin 27,13 teńgeden bosatady. Bul tarıfter syrt kózge qymbat bolyp kóringenimen, memlekettik qoldaýdyń arqasynda 85 paıyzǵa deıin sýbsıdııalanatynyn eskerýimiz kerek.
Byltyr bul baǵytqa memleketten 761 mln teńge bólinse, bıyl 317 mln teńge qarastyrylǵan. Sýbsıdııalaý tetikterin oblysta shamamen 113 aýyl sharýashylyǵy sýbektisi paıdalanyp otyr.
Buǵan deıin álemde balamasy joq sý nysany — Sátbaev kanalynyń elorda úshin mańyzy týraly jazǵan edik.
