Pavel Dýrovqa 12 túrli aıyp taǵyldy

PARIJ. KAZINFORM — Frantsııa prokýratýrasy Telegram negizin qalaýshy Pavel Dýrovtyń ótken senbide Parıjde ustalýyna baılanysty baspasóz málimdemesin taratty. Onda Dýrov birqatar qylmys jasady degen kúdikke ilingeni jáne tergeý aıasynda jaýap alynyp jatqany aıtylǵan. Bul týraly VVS jazdy.

Parıj prokýratýrasy Pavel Dýrovqa taǵylýy múmkin 12 aıypty tizip aıtqan, onyń ishinde quzyrly organdarǵa aqparat berýden bas tartý, alaıaqtyq pen esirtki satýǵa qatysynyń bolýy, balalardyń pornografııalyq vıdeolaryn saqtaýǵa, kıberqylmystarǵa, aqsha jylystatýǵa qatysýy jáne t. b. bar. 

Prokýratýra 8 shildede ashylǵan isti Kıberqylmyspen kúres ortalyǵy men Ulttyq alaıaqtyqpen kúres basqarmasy (ONAF) tergep jatqanyn aıtty.

Dýrovty qamaý merzimi 28 tamyzda aıaqtalady.

— Ustaý merzimin tergeý sýdıasy 25 tamyzda uzartty jáne uıymdasqan qylmysqa qatysty qylmystarǵa qoldanylatyn tártipti eskere otyryp, 96 saǵatqa deıin (ıaǵnı 28 tamyzǵa deıin) sozylýy múmkin, — delingen habarlamada.

Dúısenbi kúni Frantsııa prezıdenti Emmanýel Makron Dýrovtyń ustalýy «saıası sheshim» emes dep málimdedi.

— Men Pavel Dýrov qamaýǵa alynǵannan keıin Frantsııa týraly jalǵan aqparatty oqyp jatyrmyn. Frantsııa sóz jáne kommýnıkatsııa bostandyǵyna, ınnovatsııa men kásipkerlikke burynǵydan da kóbirek erkindik bergen. Solaı bolyp qala beredi, — dep jazdy Makron X áleýmettik jelisinde.

Bul — frantsýz bıliginiń senbiden bergi alǵashqy resmı túsiniktemesi boldy.

Dýrovtyń Frantsııada Le-Býrje áýejaıynda ustalǵany 25 tamyzda belgili boldy. Dýrov senbi kúni Bakýden Frantsııaǵa jeke ushaqpen ushyp kelgen.

Prokýratýranyń málimetinshe, bul oqıǵa keshki saǵat 8-de bolǵan.