Pashınıannyń Astanaǵa sapary: sarapshy kelissózderdiń basty taqyryptaryn atady
ASTANA. KAZINFORM – Armenııa Premer-mınıstri Nıkol Pashınıan búgin Qazaqstanǵa resmı saparmen keldi. Úkimet basshysynyń borty Astana áýejaıyna qondy. Jibek Joly efırinde saıasattanýshy Denıs Jılıaev bul sapardyń ekijaqty yntymaqtastyqtyń birqatar mańyzdy baǵyttaryn qamtýy múmkin ekenin atap ótti.
Saýda jáne ekonomıkalyq basymdyqtar
Sarapshy eki el arasyndaǵy saýda aınalymy ázirge tym tómen ekenin málimdedi. Bıylǵy birinshi jartyqta ol 41,6 mln dollardy qurap, EAEO-nyń ózge memleketterimen salystyrǵanda úlesi aıtarlyqtaı tómen bolǵan.
Sońǵy aılarda taraptar taýar jetkizilimin keńeıtýge belsendi kiriskeni baıqalady. Shamamen 30 jyldan keıin alǵash ret Qazaqstan Armenııaǵa bıdaı eksportyn qaıta jandandyrdy, pılottyq partııa jiberilip, joǵary baǵa alǵan. Sonymen qatar qazaqstandyq kosmetıka men turmystyq ónimderdiń eksporty jekelegen pozıtsııalar boıynsha eki-úsh esege artqan.
Armenııa tarapynan Qazaqstanǵa alkogol ónimderiniń jetkizilimi kóbeıgen. Jyl basynan beri elge taza spırtke shaqqanda 400 tonnaǵa jýyq alkogoldik ónim kelgen. Buǵan qosa, Qazaqstan armıan óndirýshilerinen shamamen 360 jańa úlgidegi kassalyq apparat satyp alǵan.
Jılıaev agrarlyq saladaǵy yntymaqtastyq ta qaıta jandanǵanyn atap ótti.
«Biz astyq jetkizý týraly kelistik, pılottyq kólemder jiberildi. Bizdiń bıdaıdyń sapasy joǵary baǵalandy», – dedi sarapshy.
Onyń aıtýynsha, eki tarap joǵary qosylǵan qundy ónimderge de qyzyǵýshylyq tanytýda.
Halyqaralyq kólik dálizderi jáne óńirlik logıstıka
Sarapshy pikirinshe, kelissózder kezinde Kavkaz arqyly ótetin túrki logıstıkalyq baǵyty da talqylanýy múmkin.
«Qazir iske asyrylyp jatqan túrki dálizi Kavkaz aýmaǵy arqyly ótedi. Bul baǵyttyń mańyzy artyp keledi», – dedi ol.
Ol Armenııa men Ázerbaıjan arasyndaǵy sońǵy kelisimder óńirlik kólik jelisin jańartýǵa múmkindik beretinin atap ótti.
Qazaqstannyń da energetıkalyq resýrstardyń transshekaralyq jetkizilimine múddeli bolýy múmkin ekenin aıtty.
«Eger biz Ázerbaıjanmen kelisip, osy dáliz arqyly jylyna bes-jeti mln tonna munaı tasymaldaýdy bastasaq, bul úlken kólemdi qamtamasyz etedi», – dedi Jılıaev.
UQShU aıasyndaǵy ahýal
Sarapshy Armenııa áli de uıymnyń resmı múshesi bolyp sanalatynyn eske saldy.
«Armenııa resmı túrde UQShU-dan shyqqan joq… Qatysýy ýaqytsha toqtatylǵanymen, uıym quramynda qalyp otyr», – dedi ol.
Jılıaevtyń aıtýynsha, sapar resmı sıpatta ótedi jáne keńeıtilgen quramdaǵy delegatsııalar qatysýymen uıymdastyrylatyn kezdesýlerdi qamtýy tıis.
«Bul – resmı sapar. Demek, kelissózder teń formatta júredi», – dedi sarapshy.
Resmı kún tártibi áli jarııalanǵan joq. Alaıda sońǵy aptalardaǵy baılanystar taraptardyń strategııalyq áriptestikti tereńdetýge jáne taýar aınalymyn ulǵaıtýǵa múddeli ekenin kórsetedi.