Parlament jańa Salyq kodeksin bekitti
ASTANA. KAZINFORM – Parlament Májilisi jańa Salyq kodeksi men ilespe qujatqa Senattyń jańa redaktsııada usynǵan jekelegen baptarymen kelisti.
Kodekstiń basty maqsaty:
- ekonomıkanyń ártúrli sektorlaryndaǵy saralanǵan salyq mólsherlemelerine kóshý;
- arnaýly salyq rejımderin reformalaý;
- memlekettik kirister organdary men salyq tóleýshiler arasyndaǵy ózara is-qımyldyń servıstik modeline kóshýdi qamtamasyz etý;
- salyq salasynda ákimshilendirýdi jańartý;
- salyq eseptiligi nysandaryn 30%-ǵa qysqarta otyryp, baqylaýdy tolyq tsıfrlandyrý;
- salyq jáne bıýdjetke tólenetin ózge de mindetti tólemder túrleriniń jalpy sanyn kem degende 20%-ǵa azaıtý;
- memleketimizdiń ınvestıtsııalyq tartymdylyǵyn arttyrý;
- qosylǵan qun salyǵyn qaıtarý protsedýrasyn jeńildetý.
Atap aıtqanda, salyq ári bıýdjettik reforma aıasynda qosylǵan qun salyǵynyń bazalyq mólsherlemesin 12%-dan 16%-ǵa deıin arttyryp, salalar boıynsha saralanǵan stavkalar usynyldy.
- Qaralyp otyrǵan zań jobalaryn Úkimet Parlament Májilisine 2024 jylǵy 28 tamyzda engizgen. 2025 jylǵy 30 sáýirde Májilis Salyq kodeksin jáne oǵan ilespe zańdy qabyldap, Parlament Senatynyń qaraýyna jiberdi. 2025 jyly 23 maýsymda olar Parlament Májilisine qaıtaryldy. Senat Salyq kodeksine 131 túzetý engizdi. Onyń ishinde 41 pozıtsııa boıynsha Kodekstiń tujyrymdamalyq tustaryn ózgertpeıtin jańa normalar usynyldy. 70 pozıtsııa boıynsha mátin, sondaı-aq ótpeli erejeler men jekelegen normatıvtik quqyqtyq aktilerdi engizý merzimderi naqtylanǵan jáne jetildirilgen. Al 20 pozıtsııada salyq salasynda ákimshilendirý boıynsha normalar naqtylanady, - dedi Májilis depýtaty Berik Beısenǵalıev palatanyń jalpy otyrysynda.
Іlespe zań boıynsha Senat 35 pozıtsııa engizdi. Olar redaktsııalyq jáne naqtylaý sıpatyna ıe, sondaı-aq Qazaqstan Respýblıkasynyń jekelegen zańnamalyq aktilerine, onyń ishinde Senat engizgen túzetýlerge sáıkes keltirýdi kózdeıdi.
- Jalpy Senat engizgen túzetýler zańdardyń tujyrymdamalyq normalaryn ózgertpeıdi. Joǵaryda aıtylǵandardy eskere otyryp, Májilistiń Qarjy jáne bıýdjet komıteti Parlament Senatynyń Salyq kodeksine jáne «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» Zańyna engizetin ózgeristeri men tolyqtyrýlarymen kelisýdi usynady, - dedi B. Beısenǵalıev.
Jalpy otyrys barysynda palata depýtattary atalǵan usynysqa qoldaý bildirdi.
Eske salsaq, bıyl 23 maýsymda Senattyń jalpy otyrysynda jańa Salyq kodeksi men ilespe qujat eki oqylymda qaraldy. Senat qujattyń jekelegen baptaryn jańa redaktsııada usynyp, ony Májiliske qaıtardy.
Jańa salyq kodeksiniń negizgi jańashyldyqtaryn myna jerden kórýge bolady.