Parlament Májilisi Sý kodeksiniń jobasyn talqylaıdy
ASTANA. KAZINFORM – Parlament Májilisinde aldaǵy ýaqytta Qazaqstan Respýblıkasynyń Sý kodeksiniń jobasy men ilespe zań jobasy talqylanady.
«Sý kodeksiniń jobasyn ázirleýdiń negizgi maqsaty – sý qaýipsizdigin qamtamasyz etý, onyń ishinde bolashaq urpaqtyń múddesi úshin biryńǵaı memleket saıasatyn iske asyrýdyń quqyqtyq negizderi men tetikterin jetildirý», - dedi depýtat Baýyrjan Smaǵulov Májilistiń jalpy otyrysynda.
Bul turǵyda ol Kodeksti qabyldaý eldiń sý áleýetin saqtaýǵa baǵyttalǵanyn aıtty. Osy saladaǵy memlekettik organdardyń quzyretterin aıqyndaý jáne naqtylaý, sondaı-aq memlekettiń saıasatyn qalyptastyrý men iske asyrýda jurtshylyq pen ǵylymnyń rólin kúsheıtý eskerilgen.
«Qujat sý qoryn saqtaý, halyqtyń jáne ekonomıka salalaryn sýmen qamtamasyz etý jónindegi mindetteri arasyndaǵy teńgerimge qol jetkizý úshin jaǵdaı jasaýǵa múmkindik beredi. Іlespe zań jobasynda qoldanystaǵy zańnamany jańa Sý kodeksimen úılestirýge, sý qoryn qorǵaýdy arttyrýǵa jáne memleket úshin quqyqtyq ári áleýmettik-ekonomıkalyq táýekelderdi azaıtýǵa baǵyttalǵan normalar engizildi. Májilistiń Ekologııa máseleleri jáne tabıǵat paıdalaný komıteti atalǵan qujattar boıynsha qorytyndy ázirleýge daıyn», - dedi Májilis depýtaty.
