Parlament depýtattary kanıkýlǵa ketti
ASTANA. KAZINFORM — Búgin Parlament palatalarynyń birlesken otyrysy ótip, onda segizinshi saılanǵan Parlamenttiń ekinshi sessııasy resmı túrde jabyldy.
Bul turǵyda depýtattar bıylǵy 1 qyrkúıekke deıin parlamenttik kanıkýl dep jarııalanatyny týraly arnaıy qaýly qabyldady.
«Búgin biz segizinshi saılanǵan Qazaqstan Parlamentiniń ekinshi sessııasynyń jumysyn aıaqtaǵaly otyrmyz. Dástúr boıynsha atqarylǵan jumysty qorytyndylaımyz, keleshekke jospar quramyz. Memleket basshysy Qasym-Jomart Kemeluly Toqaevtyń saıası reformalary Parlament jumysyna jańa baǵyt-baǵdar berdi. Kóppartııaly Parlament zań shyǵarýshy organnyń qyzmetine tyń serpin ákeldi, qoǵamnyń túrli ıdeologııalyq kózqarastaǵy áralýan ókilderiniń kelýi qabyldanatyn zańdardyń sapasyn arttyra tústi. Munyń bári — Qazaqstan parlamentarızmi tarıhyndaǵy jańa kezeńge aınaldy», — dedi Májilis tóraǵasy Erlan Qoshanov.
Onyń aıtýynsha, ótken sessııa «Kúshti Prezıdent — yqpaldy Parlament — esep beretin Úkimet» formýlasynyń tıimdiligin is júzinde dáleldedi. Bılik tarmaqtarynyń tepe-teńdigin qamtamasyz etetin bul júıe pármendi sheshimder qabyldaýǵa múmkindik týǵyzdy.
«Osynyń bári elimizdi odan ári damytýǵa, halyqtyń ál-aýqatyn arttyrýǵa baǵyttalǵan. Prezıdent jarııalaǵan «zań men tártip ústemdigi qaǵıdaty» ótken zań shyǵarý maýsymynda basty baǵdar boldy, qoǵamnyń sapaly zańdar qabyldaýǵa degen suranysyn arttyra tústi. Parlament elimizdegi eń ózekti problemalar boıynsha zańnamalyq sheshimder shyǵarý jáne olardy ashyq talqylaý alańyna aınaldy. Túıtkildi máselelerdi zańdar arqyly sheshý negizgi tetik retinde qalyptasyp keledi. Normatıvtik qujattardyń mártebesi men salmaǵy artyp otyr. Munyń bári — pármendi ári yqpaldy Parlament qalyptastyrý baǵytyndaǵy konstıtýtsııalyq reformanyń mán-mańyzyn aıshyqtaı túsýde», — dedi Májilis tóraǵasy.
Bul turǵyda E. Qoshanov osy sessııada Parlamenttik jumys kezeńi tolyq ári tabysty atqarylǵanyn aıtty.
«Memleket basshysynyń jyldaǵy Joldaýlaryn, Prezıdenttik Saılaýaldy baǵdarlamasyn, Ulttyq quryltaıda qabyldanǵan sheshimderdi iske asyrý depýtattyq korpýs qyzmetiniń negizgi ózegine aınaldy. Osyǵan baılanysty ekinshi sessııanyń zańnamalyq kúntártibi de mazmundy boldy. Palatalardyń 5 birlesken otyrysy, Májilistiń 39 otyrysy jáne Senattyń 43 otyrysy ótti. Sessııa barysynda eki palatanyń qaraýynda 179 zań jobasy boldy, onyń 120-si qabyldandy. Sessııa barysynda depýtattar birqatar mańyzdy zań jobalary boıynsha Úkimetpen birlese jumys istedi», - dedi ol.
