Parıjde Qazaqstannan 54 sportshy alǵashqy olımpıadasynda baq synaıdy

ASTANA. KAZINFORM – Frantsııa astanasy Parıj qalasynda ótetin HHHІІІ jazǵy Olımpıada oıyndaryna irikteý týrnırleri tolyǵymen aıaqtaldy. Qazirgi tańda tórtjyldyq dodaǵa joldama jeńip alǵan qazaqstandyq sportshylarymyz sońǵy oqý-jattyǵý jıyndaryn ótkizip jatyr.

Qazaqstan quramasy Olımpıada oıyndaryna sporttyń 25 túrinen 80 joldama jeńip alǵan bolatyn.

Osy oraıda, QR Ulttyq olımpıadalyq komıteti Olımpıadaǵa joldama alǵan sportshylarymyzdyń basty erekshelikterin atap ótti.

Bıylǵy Olımpıadaǵa baratyn sportshylarymyzdyń basty erekshelikteri:

• Bokstan Qazaqstan erler quramasy Olımpıadaǵa tolyq quramda barady
• Bokstan Qazaqstan áıelder quramasy tuńǵysh ret jazǵy oıyndarǵa úsh sportshyny aparady
• Breıkıng pen badmıntonnan Qazaqstan tuńǵysh ret Olımpıada joldamasyn ıelendi.
• Breıkıngten Amır Zakırov, badmıntonnan Dmıtrıı Panarın el namysyn qorǵaıdy.
• Áıelder kúresinen Qazaqstan komandasy tarıhta tuńǵysh ret Olımpıadadan syrt qaldy. 
• Semserlesýden Qazaqstan quramasy tarıhta tuńǵysh ret komandalyq jarysta baq synaıdy. 
• Qazaqstan tuńǵysh ret gımnastıkanyń úsh túrinen (batýttyq, sporttyq jáne kórkem) jazǵy Olımpıadada synǵa túsedi.
• Nysana kózdeýden Qazaqstan komandasy tuńǵysh ret alty sportshyny Olımpıadaǵa aparady. 
• Parıj Olımpıadasyna qatysatyn 80 qazaqstandyq sportshynyń ishinde 54 atlet jazǵy oıyndarǵa tuńǵysh ret qatysqaly otyr. 
• Qazaqstan olımpıadalyq quramasynyń sapynda jazǵy oıyndarǵa tórtinshi ret qatysatyn eki sportshy bar. Olar – jeńil atlet Olga Safronova men akademııalyq esý sheberi Vladıslav ıAkovlev.
• Eldos Smetov (dzıýdo), Kırıll Gerasımenko (ústel tennısi) jáne Elena Potapenko (qazirgi bessaıys) Olımpıada oıyndaryna úshinshi ret qatyspaq.
• 21 sportshy óz mansabyndaǵy ekinshi Olımpıadaǵa attanady.