Parıj Olımpıadasynyń arzan bıletteri satyla bastady
Álem jankúıerleri satylymnyń alǵashqy kezeńinde Make Your Games («Óz oıyndaryńdy jınaqta») atty bılet-paket arqyly óz qolymen basty básekeniń baǵdarlamasyn yńǵaıly etip jasaqtap ala alady. Ol úshin bylaı isteý kerek:
1). 2023 jylǵy 31 qańtarǵa deıin tickets.paris2024.org saıtynda tirkeýden ótý qajet.
2). 31 qańtardan keıin tolyq tizim jasaqtalady. Eger sizdiń ótinishińiz lotereıada tańdalsa, Make Your Games bılet-paketin satyp alasyz.
3). 2023 jylǵy 13 aqpanda tirkelgen jankúıerler arasynda jerebe ótedi. Bul jaıly habarlama ár adamnyń tirkeý kezinde kórsetilgen elektrondy poshtasyna keledi. Eskerer jaıt: habarlama alǵan azamattar 48 saǵattyń ishinde elektrondy poshtaǵa kelgen siltemeni ashyp, hatty alǵanyn rastaýy kerek. Sosyn, bılet tańdap,15 aqpannan 15 naýryzǵa deıin satyp alýyńyzǵa bolady. Jalpy Make Your Games paketine jekelegen 3 saıystyń bıleti kiredi.
Al bıletti jeke-jeke satyp alǵysy keletin jankúıerler úshin mundaı múmkindik bylaı júredi:
1). 2023 jylǵy 1 naýryz ben sáýirdiń aıaǵyna deıin tirkeýden ótý (tickets.paris2024.org)
2). 2023 jylǵy mamyrdyń basynan bastap bılet ala alasyz.
Basynda aıtqan Make Your Games bılet-paketi 72 eýro, al jekelegen bılet baǵasy 24 eýro turady. Tolyq aqparat tickets.paris2024.org saıtynda.
Parıj Olımpıadasynyń urany - Games Wide Open («Barynsha ashyq oıyndar»). Uıymdastyrýshylar osy arqyly ǵalamat áserdi birge bólisý úshin jankúıerlerdi kóptep jınaýdy kózdep otyr. Sol sebepti de «Óz oıyndaryńdy jınaqta» syndy paket olımpııa oıyndary tarıhynda alǵash ret usynylǵan.
Aıta keteıik, Halyqaralyq Olımpıada komıteti bas-aıaǵy 10 mıllıondaı bıletti satylymǵa shyǵarady. Onyń 1 mıllıony 24 eýrodan, jartysy 50 eýro jáne odan arzan baǵada qoljetimdi bolady. Taǵy 3 mıllıon bılettiń baǵasy 100 eýrodan bastalady. Tek 15% bılet qymbatqa satylmaq.
Foto: tickets.paris2024.org
