Parıj olımpıadasynda jeńis tuǵyrynan kóringim keledi – velosportshy Mahabbat Úmitjanova
- Aldymen óziń jaıly aıta ketkeniń artyq bolmas. Qaı óńirde dúnıege keldiń? Sportqa qashan qadam bastyń?
- Men Soltústik Qazaqstan oblysy velosport mektebinde tálim aldym. Alǵash ret velosport úıirmesi esigin 13 jasynda ashqan edim. Shal aqyn aýdanynyń ortalyǵy - Sergeev qalasyndaǵy №1 mektep-ınternatynda 4-6 synyp aralyǵynda oqydym.
Odan keıin Petropavl qalasyndaǵy sporttaǵy daryndy balalarǵa arnalǵan mamandandyrylǵan mektep-ınternatynda bilimimdi jalǵastyrdym. Velosporttyń álippesin jergilikti bapker Vıktor Potapov úırendim.
Asqaq arman adamdy alǵa jeteleıdi. Ol 2012 jyly Taldyqorǵan qalasyndaǵy velosporttan olımpıadaǵa daıyndyq ortalyǵyna tústi. Al 2014 jyly «Astana BePink» klýbynyń quramyna kirdi, 2016 jyly «Astana Women Team» klýby sapyna aýysty.
Onda belgili veloshabandoz Zýlfııa Zabırova menedjer qyzmetin atqaratyn edi. Bul úlken sportqa qadam basqan qazaq qyzynyń ómirindegi eleýli sátterdiń birine aınaldy.
- Saǵan velosportty úırený qıynǵa soqqan joq pa? Ádette, ol qyz balasyna aýyr soǵatyny belgili.
- Bul sózdi joqqa shyǵara almaımyn. Alǵashqyda velosıpedti ıgerip ketý ońaıǵa soqqan joq. Ýaqyt óte kele qıyndyqtyń barlyǵyn jeńe alasyń. Ony ózimniń jeke sport jolymnan kórýge bolady. Velosport álippesin úırenip, qyr-syryna qanyqqannan keıin aldyma úlken maqsat qoıdym. Qazirge deıin baǵyndyrǵan belesterim - sonyń aıqyn kýási. Árbir jarysqa qatysarda ózimdi qaırap shyǵamyn. Elimizdiń abyroıyn bıiktetsem deımin. Sol maqsatyma jetken sátte ıyǵymnan júk túskendeı sezinemin.
- Alǵashqy jetistikteriń qandaı? Qazirge deıin qandaı tabystarǵa qol jetkizdiń?
- Mahabbat 2016 jyly trekten el birinshiliginde chempıon atandym. Al shossedegi jarysta alǵashqy oryndardan kórindim. Qazaqstandyq bapkerler daıyndyǵymdy joǵary baǵalap, kóptegen halyqaralyq básekege jol ashyldy. Nátıjesinde Azııa chempıonatynda birneshe márte júldeger atandym. Azııa oıyndarynda baq synadym. El birinshiliginde talaı márte top jardym. Halyqaralyq dárejedegi sport sheberi ataǵyna ıe boldym.
Qazir qurlyqtyq dodada jeńimpaz ataný ońaıǵa soqpaıdy. Kóptegen elderde qyzdar arasyndaǵy velosport damyp ketti. Tasjol ústindegi tartysta Qytaı, Japonııa, Vetnam, Taıland, Ońtústik Koreıa, Ózbekstan sportshylary jarys kórigin qyzdyrady. Bıylǵy Azııa chempıonatynda da dál sondaı báseke boldy.
Qanshama shaqyrymǵa sozylǵan jarysta olardyń aldyna túsip ketý ońaıǵa soqqan joq. Elimizdiń abyroıyn qorǵap barǵannan keıin biz úshin sheginerge jer joq. Namysqa tyrysyp, alǵa qaraı umtyla tústim. Qarsylastarym da bas júldege barynsha talasty. Bul bárimiz úshin de qyzyqty báseke retinde erekshelendi. Máre syzyǵyn birinshi bolyp qıǵan sátte erekshe kóńil-kúıge bólendim. Qanshama jylǵy eńbektiń, daıyndyqtyń óteýi qaıtty.
Álemdik deńgeıde velosport básekeleri óte qyzyq ótedi. Erler arasynda uzaq jyldan beri uıymdastyrylatyn kópkúndikter jankúıer qaýymynyń qyzyǵa tamashalaıtyn saıystaryna aınaldy. Mundaı jarystar áıelder velosportynda da bar. Oǵan da kileń myqty veloshabandozdar jınalady. Jazǵy olımpıada oıyndary kúntizbesinde qyzdar da júldelerdi sarapqa salýǵa múmkindik aldy.
- Ózge elderdegi mamandardyń Qazaqstan velosportyna degen kózqarasy qalaı?
- Aıta ketsek, álemdik mamandar Qazaqstandy velosport joǵary damyǵan elderdiń biri sanaıdy. Sondyqtan júldege úmitkerler qataryna qosady. Bul - biz úshin úlken jaýapkershilik. Qatelikke boı aldyrýǵa bolmaıdy. Joǵary nátıjege qol jetkizýge barynsha kúsh salasyń. Osyndaı básekeniń arqasynda áriptesterimmen birge úlken tájirıbe jınaqtadyq.
Bizdi alda bedeldi básekeler kútip tur. Olardyń arasynda 2024 jylǵy Parıj olımpıadasynyń shoqtyǵy bıik. Mundaı aıtýly alamanǵa árbir sportshy qatysyp, baq synaýdy qalaıdy. Oǵan laıyqty deńgeıde daıyndyq jasaıdy. Olımpıadaǵa qatysý úshin aldymen irikteý kezeńinen irkilmeı ótýiń kerek. Aldaǵy maqsatymyz - jankúıerlerdi joǵary jetistigimizben qýantý.
Meniń ómirlik joldasym Mádı Ázen de - belgili veloshabandoz. Qyzylorda velosportynan tálim alǵan ol halyqaralyq jáne elimizdegi kóptegen jarystarda tolaıym tabysqa keneldi.
Syr velosportynyń bedeli bıik. Bul óńirden talaı myqty sportshylar shyqty. Olardyń qatarynda trek túrinen Álem chempıony Marat Satybaldıevti erekshelep aıtamyz. Sondaı-aq, jastar arasynda álemdik deńgeıde top jarǵan Sergeı Kapýstınmen de jerlesteri maqtanady. Qazirgi kúni de kelesheginen úlken úmit kúttiretin jastar shoǵyry ósip keledi.
- Qurlyqtyq dodadan keıin el birinshiliginde top jarǵanyńdy bilemiz. Qarsylastaryń jaıly ne aıtar ediń?
- Iá, el birinshiliginde toptyq jarysta jeńis tuǵyryna kóterildim. Báseke barysynda sportshylar 105 shaqyrymdyq tartysqa tústi. Márege 20 shaqyrym qalǵan sátten bastap Pavlodar oblysynan kelgen Rınata Sultanova ekeýmiz juldyzdaı júıtkip, ózge qarsylastarymyzdan oq boıy ozyq shyqtyq. Sheshýshi sátte syr bermeı, máre syzyǵyn birinshi bolyp qıdym.
- Áńgimeńe raqmet.
