Parıj Olımpıadasynda sportshylar qaı stadıondarda júldege talasady
ASTANA. KAZINFORM – Sport jankúıerleri asyǵa kútken dúbirli dodanyń bastalýyna sanaýly kún qaldy. Kazinform agenttiginiń tilshileri oqyrmandarǵa Olımpıadaǵa qatysty qyzyqty aqparattardy usynyp keledi. Bul joly sporttyq oıyndar ótetin stadıondarǵa toqtalmaqpyz.
Stade de France
Stadıon Parıjdiń soltústigindegi Sen-Denı mańynda ornalasqan. Ol 1998 jyly Frantsııada ótken fýtboldan álem chempıonaty úshin salynǵan. Qazirgi ýaqytta arena eldegi eń iri sporttyq is-sharalardy, Frantsııa ulttyq fýtbol jáne regbı komandalarynyń úıdegi matchtaryn ótkizý úshin paıdalanylady.
Stadıonnyń konfıgýratsııasy jeńil atletıka jarystaryn ótkizýge múmkindik beredi. Máselen, 2003 jyly jeńil atletıkadan álem chempıonaty osynda ótti. Arena syıymdylyǵy oqıǵaǵa baılanysty ózgerip otyrady. Máselen, 81 338 oryn (fýtbol jáne regbı), 75 000 oryn (jeńil atletıka) jáne aýqymdy kontsertterge 90 000-ǵa deıin oryn qarastyrylǵan.
Bul stadıonda Olımpıada oıyndarynyń ashylý jáne jabylý saltanaty, sondaı-aq jeńil atletıka, sonymen qatar erler men áıelder arasyndaǵy regbı 7 týrnıri ótedi.
Paris La Defense Arena
Kóp maqsatty jabyq stadıon Nanterde ornalasqan. Arena 2013 jáne 2017 jyldar aralyǵynda «Racing 92» regbı klýby úshin salynǵan. Bul satdıon ashylǵanǵa deıin Máskeýdegi Olımpıada stadıony Eýropadaǵy eń úlken jabyq stadıon bolyp sanalyp kelgen-di.
Arenanyń syıymdylyǵy regbı jarystary úshin 32 000 orynǵa, al kontsertter úshin 40 000 orynǵa teń.
Olımpıada oıyndary aıasynda stadıonda sýda júzýden jarystar jáne sý dobynan erler men áıelder arasyndaǵy týrnırlerdiń fınaly ótedi.
Stade Olympique Yves-du-Manoir
Stadıon Parıjdiń La-Garen-Kolombe mańynda ornalasqan. Ol 1907 jyly salynǵan jáne ataqty frantsýz regbıshisi Iv dıý Manýardyń esimimen atalady. Bul – Frantsııanyń tómengi lıgalarynda oınaıtyn «Racing Club de France» fýtbol klýbynyń stadıony.
Qazirgi syıymdylyǵy – shamamen 15 000 kórermen.Stadıon birneshe ret qaıta jańǵyrtylǵan.
2024 jylǵy Olımpıada oıyndary kezinde bul arenada dopty hokkeıden matchtar ótkiziledi.
Palais Omnisports de Paris-Bercy
Parıjdiń 12-shi aýdanyndaǵy Bersı býlvaryndaǵy jabyq sport arenasy 1984 jyly salynǵan. Bul nysan iri jarystar men mádenı is-sharalardy ótkizý úshin paıdalanylady. Munda jeńil atletıkadan basketbolǵa, shaıbaly hokkeıden motokrossqa deıin týrnırler, erler arasyndaǵy tennısten ATP Tour halyqaralyq týrnıri jáne áıelder arasyndaǵy gandboldan 2018 jylǵy Eýropa chempıonatynyń sońǵy raýndtary ótken.
Arenanyń syıymdylyǵy oqıǵaǵa baılanysty 7 000-nan 20 300 adamǵa deıin ózgeredi.
2024 jylǵy Olımpıada oıyndary aıasynda stadıonda basketboldan fınaldyq oıyndar men kórkem gımnastıkadan jarystar ótkiziledi.
Shâteau de Versailles
Versal saraıy 1682 jyly Lıýdovık XIV saraıynyń rezıdentsııasyna aınaldy. Al 1883 jyldan bastap saraı jáne baqtary ulttyq murajaıǵa aınalyp, 1979 jyly ıÝNESKO-nyń Dúnıejúzilik mura mártebesin alǵan alǵashqy frantsýz nysany retinde tarıhqa endi.
Olımpıada oıyndaryn ótkizý úshin saraı aýmaǵyndaq ýaqytsha arena salynǵan. Onyń syıymdylyǵy oqıǵaǵa baılanysty 15 000-nan 40 000 kórermenge deıin ózgerip turady. Munda at sporty men zamanaýı bessaıys boıynsha olımpıadalyq týrnırler ótedi.
Grand Palais Ephemere
Ǵımarat 2021 jyly sáýletshi Jan-Mıshel Vılmottyń jobasy boıynsha salynǵan. Olımpıadadan keıin qurylym joıylady. Olımpıada oıyndary kezinde munda dzıýdo, grek-rım jáne erkin kúresten jarystar ótedi. Nysannyń syıymdylyǵy shamamen 8356 adamdy quraıdy.
Chateauroux Shooting Centre
Shatorýdaǵy Ulttyq atý ortalyǵy Olımpıada oıyndary kezinde oq atýdan jarysatyn 340 olımpıadashy men 160 paralımpıadashyny qabyldaıdy. 2018 jyly Frantsýz Bulleting federatsııasy ashqan bul biregeı keshen Eýropadaǵy eń úlken keshenderdiń biri bolyp tabylady.
Ortalyq birneshe atys tırlerimen jabdyqtalǵandyqtan munda atýdan jarystardyń barlyq túrin ótkizýge bolady. 2022 jyly keshende jańa zal salyndy, onda 2024 jyly myltyq pen tapanshadan atý jarystarynyń Olımpıada jáne Paralımpıada fınaly ótedi.
Grand Palais
Parıjdiń qaq ortasyndaǵy ǵımarat 1900 jyly Parıjdegi ámbebap kórmege arnalyp salynǵan. Qurylym 2024 jylǵy Olımpıada oıyndaryna deıin eshqashan jańartylmaǵan.
Saraı kóptegen túrli sporttyq jáne mádenı is-sharalardy ótkizý orny retinde paıdalanylady: jyl saıyn álemniń ár túkpirinen kelgen sýretshilerdiń birqatar kórmeleri ótedi, al 2010 jyly semserlesýden álem chempıonaty uıymdastyryldy.
Olımpıada kezinde ǵımarattyń syıymdylyǵy 8 000 adamǵa deıin jetedi. Munda semserlesý men taekvondodan jarystar ótedi.
Paris Expo Porte de Versailles
Kórme-konferentsııa ortalyǵy Parıjdiń 15-shi aýdanynda, Port-de-Versal metro stantsııasynda ornalasqan. Bul – 1923 jyly Parıj saýda jármeńkesin ótkizý úshin salynǵan Frantsııadaǵy eń úlken saıabaq. Onyń aýdany 35 gektardy quraıdy.
Olımpıada oıyndary kezinde munda gandbol, aýyr atletıka, voleıbol jáne ústel tennısinen jarystar ótedi. Ortalyqtyń bir bóligi Olımpıada úshin arnaıy qaıta jańǵyrtyldy. Syıymdylyǵyna toqtalsaq, voleıbol týrnıri úshin 12 000 adamdy, gandboldan 7 800-ge deıin jáne ústel tennısi men aýyr atletıkadan 6 000 adamǵa deıin qabyldaıdy.
Les Invalides
Parıjdegi eń ádemi eskertkishterdiń biri, múgedekter saraıyna qarama-qarsy ornalasqan. Olımpıada ýaqytynda sadaq atý, tas jol velosporty jáne jeńil atletıka (marafon) boıynsha jarystardyń arenasyna aınalady. Orynnyń syıymdylyǵy shamamen 8 000 adamdy quraıdy.
Nautical Stadium Vaires-sur-Marne
Vere-sur-Marne – 4 400 sharshy metrdi quraıtyn sport ortalyǵy. 2019 jyldyń maýsym aıynda salynǵan. Stadıonda baıdarka men kanoe esýden Olımpıadalyq jarystar ótedi.
Beıjiń jáne Sıdneımen qatar ol Olımpıadalyq jáne Paralımpıadalyq baıdarka men kanoede esý, onyń ishinde slalom boıynsha jarystar ótkizetin álemdegi úzdik úsh sporttyq nysannyń biri.
Place de la Concorde
Parıjdegi eń úlken alań qalanyń 8-shi aýdanynda, Elıseı dalasynyń shyǵys bóliginde ornalasqan. Bul oryn frantsýz tóńkerisi kezindegi korol Lıýdovık XVI, Marı Antýanetta jáne Maksımılıen Robesperdi qosa alǵanda, kópshiliktiń ólim jazasyna kesilgen orny retinde tanymal.
Olımpıadada bul qalalyq saıabaqta 27 shildeden 10 tamyz senbisine deıin úzilissiz sporttyq jarys ótedi - skeıtbordıng, BMX-frıstaıl jáne 3×3 basketbol. Orynnyń syıymdylyǵy 30 myń adamǵa deıin jetedi.
The Porte de La Chapelle Arena
Arena eko-stılde jobalanǵan (qasbeti qaıta óńdeletin alıýmınıımen qaptalǵan jáne qurylys materıaldarynyń kópshiligi bıo negizinde), 2024 jyldyń basynda ashylǵan. Parıjdiń La-Shapell aýdanynda ornalasqan qurylymnyń syıymdylyǵy 8 myń adamǵa deıin jetedi.
Olımpıadadan keıin arena «Parıj» basketbol klýbynyń úıdegi oıyndaryn ótkizetin arenaǵa aınalady.
Olımpıada oıyndary aıasynda stadıonda badmınton (6 700 kórermenge deıin) jáne kórkem gımnastıkadan (7 000 kórermenge deıin) jarystar ótedi.
Le Bourget Sport climbing venue
1982 jyly salynǵan nysan 2024 jylǵy Olımpıada oıyndary úshin arnaıy túrlendirilip, tek jarys ýaqytynda ǵana paıdalanylady. Sporttyq órmeleý ortalyǵy Parıj-Sharl de Goll áýejaıynyń janynda Vılpentedegi Le Býrje jańa sport saıabaǵynda ornalasqan.
Órmeleý qabyrǵasy oıyndarǵa birneshe kún qalǵanda ornatylýy kerek. Kórermenderdi ornalastyrý úshin syıymdylyǵy 6 000 adamdyq trıbýna ornatylady.
Stade Roland Garros
Stadıon – Býa-de-Býlonnyń shetinde ornalasqan tennıs korttarynyń kesheni. Munda jyl saıyn dástúrli túrde French Open týrnıri ótedi. Rolan Garros 1928 jyly salynǵan jáne frantsýz ushqyshy jáne Birinshi dúnıejúzilik soǵys batyry Rolan Garrostyń qurmetine atalǵan.
Ortalyq tennıstiń qajettilikterine nazar aýdara otyryp, birneshe ret qaıta quryldy jáne ózgertildi. Stadıonda barlyǵy 24 tennıs korty bar, onyń úsheýin iri matchtar úshin paıdalanýǵa bolady. Olımpıada oıyndary kezinde sstadıonda tennıs pen bokstan jarystar ótedi.
North Paris Arena
Oıyndar úshin Paris NorthVillepinte kórme ortalyǵy Paris North Arena dep atalatyn úlken modýldik sporttyq nysanǵa aınalady. Frantsııadaǵy eń úlken ortalyqta toǵyz pavılon bar.
Olımpıada oıyndary aıasynda boks týrnıriniń aldyn ala raýndtary men zamanaýı bessaıys semserlesý kezeńi, sondaı-aq Paralımpıada oıyndary aıasynda otyryp voleıbol týrnıri ótedi.
Velodrome de Saint-Quentin-en-Yvelines
Montını-le-Bretonne velodromy 2011-2014 jyldar aralyǵynda salynǵan. Sodan beri ol 2015, 2022 jylǵy velosporttan álem chempıonatyn jáne 2016 jylǵy jeńil atletıkadan Eýropa chempıonatyn qabyldady. Sondaı-aq bul nysan – Frantsııa velosport federatsııasynyń shtab-páteri jáne ulttyq quramanyń jattyǵý ortalyǵy.
Arenanyń syıymdylyǵy shamamen 5 000 kórermendi quraıdy. Munda Olımpıada oıyndary aıasynda erler men áıelder arasynda velosporttan jarystar ótedi.
Pont Alexandre III
Sena ózeniniń eki jaǵalaýy arasyndaǵy kópir Parıjdiń qaq ortasynda ornalasqan jáne sansyz eskertkishtermen qorshalǵan. Ol 1900 jylǵy Dúnıejúzilik kórme úshin ashylǵannan beri qalanyń eń este qalatyn oqıǵalarynyń bir bóligi boldy jáne óz aldyna óner týyndysy men sáýlettik eskertkish bolyp tabylady.
Eni 45 metr jáne uzyndyǵy 107 metr kópir tórt baǵanmen jáne tireýish altyn qola músindermen shektelgen. Munda Olımpıada oıyndary kezinde velosport, trıatlon jáne ashyq sýda júzý týrnıri ótedi.
The Hotel de Ville
Tarıhı ǵımarat pen onyń atymen atalatyn alań Sena ózeniniń boıynda ornalasqan. Bul jerde júgirý marafony bastalady.
Trocadéro
Bul alańda Olımpıada oıyndary kezinde velosport pen jeńil atletıkadan jarystar (20 shaqyrymdyq júgirý joly) úshin paıdalanylady.
Onyń syıymdylyǵy shamamen 3 349 adamdy quraıdy. Alań týrısterge óte tanymal, sebebi ol Eıfel munarasynyń eń jaqsy kórinisin usynady.
