Parıj Olımpıadasyna daıyndyq jumystary qalaı júrip jatyr
ASTANA. KAZINFORM – Olımpıadaǵa daıyndyq jumystaryna arnalǵan Shtab óz jumysyn jalǵastyryp jatyr. Kanvondaǵy (Koreıa) qysqy Jasóspirimder Olımpıadasynda Ulttyq qurama sportshylary sátti óner kórsetkennen keıin Shtab Parıjdegi jazǵy Olımpıada men Paralımpıadaǵa daıyndyqty bastady.
QR Sport komıteti málim etkendeı, XXXIII jazǵy Olımpııa oıyndary 26 shilde men 11 tamyz aralyǵynda ótedi. Tórtjyldyqtyń basty dodasyna álemniń 205 elinen 10 myńnan astam sportshy qatysady dep josparlanǵan. Parıjdegi dodada 32 sport túrinen 329 medal jıyntyǵy sarapqa salynady.
Qazirgi tańda Qazaqstan ulttyq quramasynyń qorjynynda Parıj Olımpıadasynyń 19 lıtsenzııasy (sporttyń 8 túrinen) bar (sadaq atý – 4, veloshosse – 3, nysana kózdeý – 5, qazirgi bessaıys – 2, boks – 2, grek-rım kúresi – 1, erkin kúres – 1, sporttyq gımnastıka – 1). Olımpııa oıyndaryna deıin 69 lıtsenzııalyq jarys qaldy. Onyń ishinde 5 álem chempıonaty, 7 Azııa chempıonaty jáne 57 reıtıngtik týrnır bar.
«Bıylǵy jyldyń basty sporttyq oqıǵasy – Parıjdegi jazǵy Olımpııa oıyndary bolmaq. Shtabtyń aldaǵy maqsaty – halyqaralyq týrnırlerde sportshylardyń sátti óner kórsetýine jaǵdaı jasaý jáne múmkindiginshe kóp lıtsenzııa oljalaý. Qurama kóshbasshylary ár sport túriniń ereksheligi, sportshynyń qajettiligi, medıtsınalyq-bıologııalyq turǵyda qamtamasyz etilgeni, onyń ishinde fızıoterapııa, ońaltý men jaraqattardyń aldyn alý, psıhologııalyq qoldaý jáne jarysqa daıyndyq kezinde kúızelisti jeńý sııaqty jaǵdaılar eskerilgen jeke jospar boıynsha daıyndalady. Sonymen qatar shtab sportshylar men delegatsııa múshelerin kerek-jaraqpen qamtamasyz etý máselesin qarastyryp jatyr», - dedi Olımpıadaǵa daıyndyq jónindegi shtab basshysy Elsııar Qanaǵatov.
Shtab – Memleket basshysynyń Týrızm jáne sport mınıstrligi, Ulttyq Olımpıada komıteti jáne sport federatsııalary birlese jumys isteý kerek degen tapsyrmasyn oryndaý maqsatynda qurylǵan ýákiletti organ. Shtabtyń negizgi jumysy – sportshylardyń aldaǵy jarystarǵa sapaly daıyndyǵyn qamtamasyz etý. Shtab barlyq keshendi jarystar aıaqtalǵanǵa deıin turaqty negizde jumys isteıtin bolady.
