Parıj Olımpıadasy-2024: Qazaq boksynyń qarqyny qalaı
ASTANA. KAZINFORM - Italııanyń Býsto-Arsıtsıo qalasynda ótip jatqan lıtsenzııalyq týrnırde qazaqstandyq boksshylar 2024 jylǵy Parıj Olımpıadasyna bes joldamaǵa ıe boldy. Endi el quramasy qorjynynda erlerde alty, áıelderde bir joldama bar. Alda taǵy bir lıtsenzııalyq jarys kútip tur. Aıtýly alamanda elimizdiń atynan qansha bylǵary qolǵap sheberi baq synaı alady? Kazinform osy taqyryp boıynsha múmkindigimizdi saraptap, oı-tarazysyna salyp kórgen edi.
Jeti joldama qolda tur
Jazǵy Olımpıada oıyndary 2024 jyldyń 26 shildesinde bastalyp, 11 tamyz kúni máresine jetedi. Olımpıada baǵdarlamasyna 32 sport túri engizilgen. Dúbirli dodada erler 51, 57, 63,5, 71, 80, 92, 92 keliden joǵary salmaqta júldeni sarapqa salady. Al áıelder arasynda 50, 54, 57, 60, 66, 75 kelide jekpe-jek ótedi.
Ázirge erler quramasy 63,5 keli salmaqta ǵana joldamaǵa qol jetkize alǵan joq. Italııa tórinde bul salmaqta Muhammedsabyr Bazarbaıuly jarys jolynan shyǵyp qaldy. Qalǵan salmaqta el namysyn qorǵaǵan Cáken Bıbosynov (51 keli), Mahmýd Sabyrhan (57 keli) Nurbek Oralbaı (80 keli), Aslanbek Shymbergenov (71 keli), Aıbek Oralbaı (92 keli) jartylaı fınalǵa deıin jetip, joldamany enshiledi.
Al áıelderde Alýa Balqybekova (50 keli), Jaına Shekerbekova (54 keli), Rımma Volosenko (60 keli), Muhammedsabyr Bazarbaıuly (63,5 keli), Natalıa Bogdanova (66 keli), Valentına Halzova (75 keli) jarys jolynan shyǵyp qaldy.
Sondaı-aq, 2023 jyly Qytaıda ótken Azııa oıyndarynda Qamshybek Qońqabaev (92 keliden joǵary) pen áıelderde Karına Ibragımova (57 keli) Frantsııaǵa baratyn sportshylar tizimine enip úlgerdi.
«Bokstan Italııadaǵy Olımpıadaǵa irikteý týrnırinde el quramasy sátti óner kórsetip, Parıjdegi dúbirli dodaǵa joldama jeńip aldy. El jankúıerleri qashan da boksshylardan úzdik nátıje kútedi. Boksshylar bul joly jankúıerlerdiń senimin aqtap, ulttyq qurama qorjynyn mańyzdy lıtsenzııalarmen tolyqtyrdy. Endi Olımpıadaǵa daıyndyqty kúsheıtip, Parıj tórinde top jarýlaryńyzǵa tilektespin», - dedi QR týrızm jáne sport mınıstri Ermek Marjyqpaev.
Endi taǵy lıtsenzııalyq týrnır 2024 jyldyń 23 mamyry men 3 maýsymy aralyǵynda Taıland astanasy Bangkok qalasynda bolady. Bul týrnırde qazaqstandyq boksshylar erlerde bir, áıelderde bes joldamaǵa talasady.
Júldesiz qaıtpaǵan jampozdar
Qazaqstan táýelsiz el retinde 1996 jyldan beri Jazǵy Olımpıada oıyndaryna qatysyp keledi. Qazirge deıin qazaqstandyq sportshylar barlyǵy 71 medalǵa qol jetkizip úlgerdi. Onyń ishinde 15-i – altyn, 20-sy – kúmis, 36-sy – qola. Aıta ketsek, medaldiń úshten bir bóligin boksshylar alǵan. Qazaqstandyq bylǵary qolǵap sheberleri 7 altyn, 7 kúmis, 10 qola júldege ıe boldy.
«Men uzaq jyldan beri Qazaqstan boksyna jankúıerlik jasap kelemin. Qaı kezde de olar jankúıer qaýymyn laıyqty jeńisimen qýantyp keledi. Olardyń árbiriniń esimi jadymyzda jattalyp qaldy. Sol jeńisti jol aldaǵy ýaqytta jalǵasyn tabady degen senimdemin», - deıdi jankúıer Ǵalymjan Tursynbekuly.
- 1996 jyly Atlanta Olımpıadasynda el quramasynda bokstan Vasılıı Jırov (81 keli) chempıondyq tuǵyrǵa kóterilse, Bolat Jumadilov (51 keli) kúmis júldeger atandy. Al Bolat Nııazymbetov (63,5 keli) pen Ermahan Ibragımov (71 keli) qola júldege qol sozdy.
- 2000 jyly Sıdneı Olımpıadasynda qorjynǵa Bekzat Sattarhanov (48 keli) jáne Ermahan Ibragımov altyn salsa, Bolat Jumadilov pen Muhtar Dildabekov (91 keliden joǵary) kúmis medal ıegeri atandy.
- 2004 jyly Baqtııar Artaev (69 keli) chempıon bolsa, Gennadıı Golovkın (75 keli) ekinshi oryn aldy.
- 2008 jyly el quramasynan Baqyt Sársekbaev (69 keli) altynnan alqa taqsa, Erkebulan Shynálıev (81 keli) úzdik úshtikti túıindedi.
- 2012 jyly qazaqstandyq boksshylar qatarynan Serik Sápıev (69 keli) chempıon, Ádilbek Nııazymbetov (81 keli) kúmis, Marına Volnova (75 keli) jáne Ivan Dychko (91 keliden joǵary) qola júldeger atandy.
- 2016 jyly Danııar Eleýsinov (69 keli) jeńis tuǵyryna kóterilse, Vasılıı Levıt (91 keli) pen Ádilbek Nııazymbetov (81 keli) kúmis júlde aldy. Al Ivan Dychko (91 keliden joǵary) jáne Darıǵa Shákimova (75 keli) úshinshi oryn tuǵyrynan kórindi.
- 2020 jyly (pandemııaǵa baılanysty 2021 jyly ótti) óz tarıhynda alǵash ret altyn jáne kúmis medalǵa qol jetkize alǵan joq. El quramasynan Sáken Bıbosynov (52 keli) pen Qamshybek Qońqabaev (91 keliden joǵary) qola júldeni qanaǵat tutty.
Kimderge senim artamyz?
Bıyl qazaqstandyq sportshylar óz tarıhynda táýelsiz el retinde segizinshi Jazǵy Olımpıadada baq synaýǵa múmkindik alyp otyr. Barlyǵynan da jerlesterimiz júldesiz qaıtqan joq. Bul jankúıerlerdi qýantady. Ásirese, boksshylarǵa artylatyn úmit zor. Sondyqtan olardyń kókeıinde «Boksshylar qansha júlde alady?» degen saýal turatyny sózsiz.
Barlyǵyn sharshy alańdaǵy jekpe-jek sheshedi. Árıne, oǵan boksshylardyń daıyndyǵy, sheberligi, tájirıbesi kerek. Biz qazaqstandyq barlyq bylǵary qolǵap sheberiniń júldeli orynnan kóringenin qalaımyz. Dese de, Olımpıadaǵa álemniń ár qıyrynan baratyn sportshylar júldegerler qatarynan kórinýge kúsh salatyny belgili. Endeshe, qazir joldamaǵa ıe bolǵan qazaqstandyq alty boksshynyń arasynan kim chempıon atanýy múmkin? Qaısysy júldegerler qatarynan kórine alady?
«Bokstan el quramasy sapynda Sáken Bıbosynov pen Qamshybek Qońqabaev budan burynǵy Olımpıadaǵa qatysyp, júldegerler qatarynan kórine bildi. Qazir olardyń jasy otyzdan asty, tájirıbe tolysty, sheberligi artty. Endigi kezekte olar múmkindigin múlt jibermeýge tyrysady degen oıdamyn. Sondaı-aq, qazir jankúıerler Mahmýd Sabyrhannyń qabileti-qarymyn, jyldamdyǵyn jaqsy biledi. Keıingi jyldarda Aslanbektiń de nátıjesi jaqsardy. Aıbek pen Nurbek Oralbaı syndy boksshylar da eshkimniń yǵyna jyǵyla qoımaıdy degen oıdamyn. Men olardyń barlyǵynan júlde kútemin. Barlyǵy da chempıon bolýǵa laıyqty», - deıdi sport jýrnalısi Teljan Kúderov.
Endi úsh-tórt aıdyń aınalasynda Parıj Olımpıadasy jalaýyn kóteredi. Aıtýly alamanda qazaqstandyq sportshylardyń joǵary tabysqa jetýine senim artamyz. Olardyń qatarynda qazaqstandyq bylǵary qolǵap sheberleri de bar. Árıne, ázirge joldama sanyn tolyqtyra túsýge kóńil bólgenimiz artyq emes.
