Parıj masters týrnıri: Aleksandr Býblık úshinshi aınalymǵa shyqty

ASTANA. KAZINFORM — Qazaqstannyń birinshi, álemniń 16-raketkasy Aleksandr Býblık Parıj masters týrnıriniń úshinshi aınalymyna joldama aldy.

Aıtýly dodanyń 13-raketkasy bolyp tirkelgen qazaqstandyq tennısshi ekinshi aınalymda dúnıejúzilik reıtıngide 32-orynda turǵan frantsııalyq Korenten Mýtemen oınady.

Qarsylastar buǵan deıin úsh ret kezdesip, bárinde Býblık basym túsken bolatyn. Bıyl naýryzda AQSh-taǵy Fınıks chellendjer jarysynyń shırek fınalynda Býblık kambek jasap, 2:6, 7:6 (7:4), 7:5 esebimen jeńgen edi. Sol matchta tennısshiler bir-birimen sózge kelip, shekisip qala jazdaǵan bolatyn. 

Osy aıda K.Mýte Almaty ATP 250 týrnıriniń fınalyna deıin jetip, onda reseılik Danııl Medvedevke 5:7, 6:4, 3:6 esebimen ese jiberdi.

Bul joly Parıjde jankúıerler jergilikti sportshyny qoldap otyrdy. Onyń ústine Býblıktiń alǵashqy aınalymdaǵy oıynnan keıin aýstralııalyq Alekseı Popyrınge qol bermeýi otqa maı quıa túskendeı edi. Sondaı-aq K.Mýte báseke aldynda A.Býblıkti úıine qaıtaramyn dep málimdegen bolatyn. 

Birinshi partııada esep 2:1 bolǵan mezette Býblık breık jasap, sol basymdylyqty saqtap qaldy – 6:3. 

Tartysty órbigen ekinshi sette esep 5:5 bolǵanda, A.Býblık breıkke qol jetkizdi. Sodan keıin matchqa dop bergende, qatelesken joq – 7:5.

Qazaqstandyq tennısshi sabyrly oıyn órnegin kórsete bildi. Al Mýte emotsııaǵa boı aldyryp, raketkasyn laqtyryp, tóreshiden eskertý de aldy. 

Bir saǵat 36 mınýtqa sozylǵan básekede Býblık 6 eıspen birge 10 breık-poınttyń ekeýin óz esebine jazdy. Mýte 3 eıs jasaǵanymen, 1 breık-poıntty paıdalana almady. 

Aleksandr Býblık shırek fınalǵa shyǵý úshin álemniń 4-raketkasy, amerıkalyq Teılor Frıtspen talasady.

Ótken jyly A.Býblık Parıjde ekinshi aınalymnan asa almasa, bıyl sol kórsetkishin jaqsartty. Qazirgi kezde ol ATP Live reıtıngisinde 15-orynǵa kóterilip tur.

Eske sala keteıik, budan buryn Elena Rybakınanyń WTA qorytyndy týrnırindegi qarsylastary anyqtalǵanyn jazǵan bolatynbyz.

Sondaı-aq Qytaıdaǵy jarysta Pýtıntseva taǵy bir qarsylasyn aıqyn basymdylyqpen utty.