Paralımpıada: Qazaqstan voleıbolshylary jartylaı fınaldan tys qaldy

PARIJ. KAZINFORM — Frantsııa astanasy Parıjde ótip jatqan Paralımpıada oıyndarynda voleıboldy otyryp oınaýdan Qazaqstan quramasy toptyq kezeńde Mysyrmen kezdesti.

Osyǵan deıin qazaqstandyqtar men mysyrlyqtar óz tobynda Frantsııany utyp, Bosnııa jáne Gertsegovına quramasyna ese jibergen. Sondyqtan qaı jeńgeni ekinshi orynmen jartylaı fınalǵa joldama alatyn edi. 

Qazaqstan quramasynyń bas bapkeri Baýyrjan Tahaýov komanda kapıtany, baılanystyrýshy Baýyrjan Sartaev, Erbolat Altaev, Erlan Bımuratov, Erik Qasqabaev, Perdebaı Namuratov, Erasyl Ábdibekke senim artty. Arasynda basqa oıynshylar da qosylyp otyrdy.

Birinshi partııada qazaqstandyqtar 6:8 esebimen jeńilip jatyp, tarazy basyn teńestirip qana qoımaı, alǵa shyqty – 11:8. Alaıda mysyrlyqtar set sońyna taman kúsh alyp ketti – 25:21. 

Ekinshisinde mysyrlyqtar alǵa ketkenimen (9:4), Tahaýov shákirtteri esepti qysqartty – 7:9.

Sosyn qarsylas komanda taǵy uzap ketti. Degenmen Perdebaı Namuratov eki ret eıs jasap, Qazaqstandy alǵa shyǵardy – 21:20. Biraq sol múmkindikti paıdalana almady – 23:25.

Úshinshi setti Mysyr quramasy jaqsy bastady – 6:2. Degenmen qazaqstandyqtar alǵa shyǵa bildi – 9:7. Sosyn 14:8-ge jetkizdi. Sol basymdylyqtan aıyrylǵan joq – 25:16.

Tórtinshi partııada mysyrlyqtar qara úzip ketti – 16:6. Aqyry olar degenine jetti – 25:18. Qorytyndy esep – 3:1, Mysyrdyń paıdasynda.

Osylaısha, Qazaqstan para voleıbolshylary jartylaı fınalǵa shyǵa almaı, júldeli oryndarǵa talasý múmkindiginen aıyryldy.

Eske sala keteıik, budan buryn Qazaqstan para voleıbolshylary asa tartysty oıynda Paralımpıada chempıonyna jol bergenin jazǵan bolatynbyz.