«Paraqor memlekettik qyzmetkerler ustalyp jatyr»- respýblıkalyq basylymdarǵa sholý
***
«Astanada sybaılas jemqorlyqqa belshesinen batqan memlekettik qyzmetkerlerdiń sany artyp keledi. Qarjy polıtsııasy organdary buny, eń birinshi, óz qyzmetiniń tıimdiligimen baılanystyrsa, ekinshi jaǵynan, halyqtyń quqyq qorǵaý júıesine degen senimniń artqandyǵy retinde qarastyryp otyr. Qalaı desek te, astanalyq qarjy polıtseıleri sońǵy alty aıda sybaılas jemqorlyqqa qatysy bar 74 memlekettik qyzmetkerdi ustap, olardyń 15-sin sottap úlgerdi. Bul ótken jylmen salystyrǵanda, eki ese artyq», - dep jazady «Alash aınasy» gazeti búgingi sanynda jaryq kórgen maqalady. Elimizdiń elordasynda oryn alyp jatqan osynaý bir kesel jaıynda tereńirek «Paraqor memlekettik qyzmetkerler quryqtalyp jatyr» degen maqaladan oqyp bile alasyzdar.
«Alash aınasy» gazetiniń turaqty «Dat!» aıdarynda medıtsına ǵylymynyń doktory, professor Qadyrbek Ramazanmen aradaǵy suhbat «Medıtsına salasyna saıasatty aralastyrmaı, tek ǵylymnyń óresimen damytqan lázim» degen taqyryppen jaryq kórgen. Basylym tilshisiniń barlyq saýaldaryna tuşymdy jaýap bergen ol: «Medıtsına salasy saıasatqa emes, ǵylymǵa negizdelgeni lázim. ótıkeni kez kelgen eldiń medıtsınasyndaǵy jetistigi - onyń órkenıettik qana emes, ekonomıkalyq-áleýmettik jetistigi sanalady. Sondyqtan da, osy salaǵa tutastaı betburys jasaý arqyly eldiń erteńgi dańǵyl jolyn da daralaýǵa tıispiz. Bul - erteńge ysyrylmaıtyn, búgin jasalatyn dúnıe», - deıdi.
***
Jalpy Qazaqstan týrıstik turǵydan alyp qaraǵanda qaı jaǵynan bolsa da tartymdy. Tanymdyq, etnıkalyq, ekologııalyq, oıyn-saýyqtyq, saýyqtyrý, sporttyq, balalarǵa arnalǵan, ańshylyq, atbegilik, qusbegilik, taǵy da ary qaraı tizbektelip kete beredi. Tek osy múmkindikti biz júıeli túrde paıdalana almaı jatqandaımyz. Іshki týrızmniń aqsap jatqany jıi aıtylady. Týrıstik kompanııalardyń kóbi alys ta jaqyn shet memleketterge týrıstik joldama ázirleýden aryǵa aspaıdy. Іshki týrızmdi damytýdyń eń basty kilti - bizdińshe, reti kelse mektep oqýshylary men stýdentterge elimizdiń tarıhı oryndaryna týrıstik saparlar uıymdastyrýdy qolǵa alý. Mine, dál osy máseleni kótergen «Aıqyn» gazeti búgingi nómirinde «Balalar týrızmine kóńil bólsek qaıtedi?» degen taqyryppen maqala basyp otyr.
«Adamnyń basy - Allanyń doby» desek, dúnıede eń erekshe jaratylǵan dop - osy bolsa kerek-ti. Bilgenge Alla bar sezim múshelerin, adam denesin basqarý «pýltin», aǵzaǵa qajetti «janar-jaǵarmaıdy» qabyldaıtyn qaqpany da osy bastyń úlesine berip qoıǵan. Biri kemistik etse, búkil dene aqsaıdy. Dese de, bastyń qadirine baryp júrmiz be? Kóz, qulaq, muryn, til, tis - qaı-qaısysynyń da qyzmetin molynan paıdalanǵanymyzben, kútimine kelgende, kerjalqaýlaýmyz. Qadirin qoıyp, onyń qupııalaryn da bile bermeımiz-aý osy. Endeshe, «Aıqyn» gazetiniń búgingi «Basta da talaı qyzyq bar...» degen taqyryptan ózimiz ómir boıy óńgerip júretin basymyzdyń biz bile bermeıtin qyrlary jaıynda tereńirek maǵlumat alyńyz.
***
«Astana aqshamy» gazetiniń jazýynsha, keshe elorda ákiminiń orynbasary Aıda Balaevanyń tóraǵalyǵymen densaýlyq saqtaý basqarmasy ana men náreste ólimin azaıtý jónindegi qalalyq shtabtyń otyrysy ótti. Jıynda aǵymdaǵy jyldyń 7 aıynda jasalǵan jumystardyń qorytyndysy shyǵaryldy. «Otyrysta ana men nireste ólimin azaıtý jáne boldyrmaý úshin eń aldymen statsıonarlar men perzenthalardyń jáne alǵashqy medıtsınalyq-sanıtarlyq kómek kórsetý uıymdarynyń ózara baılanysy bolý qajettigi aıtyldy. Atalǵan mekemelerdiń jumysyn ońtaılandyrý úshin arnaıy reglament talqylanyp, bekitildi», - dep jazady basylym.
***
«Kazahstanskaıa pravda» gazetiniń jazýynsha, Óskemendegi taý-ken metallýrgııalyq jabdyqtar konstrýktorlyq bıýrosy 400 myń teńge kóleminde alǵashqy roıaltı aldy. Mekemege alǵashqy roıaltı «Qazmyrysh» kompanııasymen aradaǵy tehnologııalyq kelisimge sáıkes shahtalyq jeldetkish óndirisin jolǵa qoıǵany úshin berildi. Konstrýktorlyq bıýro qajetti konstrýktorlyq qujatnamasyn satyp alyp, ony beıimdedi jáne jeldetkish kórsetkishin jaqsartý úshin ózgertti. Atap aıtqanda, buǵan deıin qoldanylyp kelgen qurama qanatty jeldetkishtiń ornyna tutas quıylǵan nusqasyn ázirledi. Budan ári bıýro «Týrbomash» JShS-men birlesip, jeldetkishtiń VME-5, VME-6, VME-8 túrleriniń óndirisin uıymdastyrdy. Alǵashqy partııa tapsyrys berýshi «Qazmyrysh» kompanııasyna jetkizildi. Nátıjesinde konstrýktorlyq bıýro 400 myń teńge kóleminde alǵashqy roıaltı aldy», - dep túsindirdi atalǵan bıýronyń dırektory Mırat Qusmanov.
