Paragvaıda qaıtys bolǵan bıznesmenniń Qazaqstanǵa qatysy joq: QR SІM túsinik berdi

NUR-SULTAN. QazAqparat – Elimizdiń syrtqy ister mınıstrligi Paragvaıda qaıtys boldy degen kásipkerge qatysty túsinik berdi, dep habarlaıdy QazAqparat tilshisi.

«Qurmetti dostar, osymen ekinshi kún BAQ-ta Paragvaıda qazaqstandyq bıznesmenniń múshelenip, óltirilgeni týraly aqparat tarap jatyr. Osyǵan oraı ólgen adamnyń Qazaqstannyń azamaty emes ekenin aıtqymyz keledi. Ol keńes odaǵy kezinde, ıaǵnı QazKSR zamanynda týyp, 80 jyldary elimizden ketken bolýy kerek. Sondyqtan ol kisini qazaqstandyq bıznesmen dep aıtý durys emes, onyń ústine qazaqstandyq azamat ta emes», - dep habarlady QR SІM-niń resmı ókili Aıbek Smadııarov.

QR SІM-niń aqparatyna sáıkes, marqumnyń reseılik tólqujaty bolǵan.

«Marqum bolǵan adamdy Qazaqstan azamaty degen aqparatty reseılik BAQ ókilderi taratqan. Degenmen onyń anyq-qanyǵyna eshkim jetpegen. Sondyqtan aqparattyń qate ekenin eskertkimiz keledi», -deıdi mınıstrlikten.