Para berdi: SQO-da aýdandyq bilim bóliminiń eks-basshysyna aıyp taǵyldy

PETROPAVL. QazAqparat – Soltústik Qazaqstan oblysynda aýdandyq bilim bólimin burynǵy basshysy para berdi degen kúdikke ilindi. Sondaı-aq ol jeti mektepte oryndalmaǵan jumysty qabyldap, bıýdjetke 7 mln teńge somasynda shyǵyn keltirdi dep aıyptalyp jatyr, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttigi SQO boıynsha departamentiniń basshysy Sergeı Perovtyń aıtýynsha, el boıynsha orta jáne mektepke deıingi bilim berý salasynda sybaılas jemqorlyq táýekelderine syrtqy taldaý aıaqtaldy.

Bilim berý sapasyn jaqsartýǵa baǵyttalǵan sharalarǵa qaramastan, sońǵy jyldary bul sala sybaılas jemqorlyq boıynsha aldyńǵy úshtikke kiredi. Máselen, respýblıka boıynsha úsh júzden astam qylmystyq quqyq buzýshylyq jasalsa, 143 adam sottaldy.

«SQO-ǵa keler bolsaq. Qazir sotta aýdandyq bilim bóliminiń burynǵy basshysy S.Ramazanovanyń isi qaralyp jatyr. Ol máseleni memlekettik aýdıt qyzmetkerlerine 650 myń teńge para berip sheshpek bolǵan. Bul somany sheneýnik qaltasynan shyǵarmaı, memlekettik bıýdjetten urlaǵan.

Sonymen qatar ol jeke kásipkermen sóz baılasyp, osy aýdannyń jeti mektebinde órt dabylyn jóndeý boıynsha oryndalmaǵan jumysty qabyldap, 7 mln teńge kóleminde bıýdjetke shyǵyn keltirdi», - deıdi Sergeı Perov.

Ramazanovanyń kinásin sot anyqtap jatyr.

«Bıyl bilim berý salasyna 138,8 mlrd teńge bólindi. Onyń ishinde eńbekaqy tóleý qory – 112,6 mlrd teńge. Tekseris barysynda sybaılas jemqorlyqqa jaǵdaı jasaıtyn júıeli máseleler anyqtaldy. Eńbekaqyny, túrli qosymsha aqylardy zańsyz esepteý, sondaı-aq naqty oryndalmaǵan jumystardy tóleý sııaqty bıýdjet qarajatyn urlaý shemalary ashyldy», - deıdi departament basshysy.