Papa Lev XIV ótkizgen messege 1 mıllıonnan astam adam qatysty

ASTANA. KAZINFORM — Rımniń Tor-Vergata aýdanynda Papa Lev XIV-pen kezdesý úshin álemniń 146 elinen 1 mıllıonnan astam jas dindar jınaldy. Qudaıǵa qulshylyq etý rásimine 20 kardınal, 450-ge jýyq epıskop jáne 7000-ǵa jýyq dinı qyzmetker qatysty, dep jazdy DW.

2025 jylǵy 3 tamyz, jeksenbi kúni Vatıkan uıymdastyrǵan Halyqaralyq jastar kúni Rım shetinde ótken úlken messemen aıaqtaldy. Vatican News habarlaǵandaı, Papa Lev XIV-pen birge messege qatysý úshin Tor-Vergata aýdanynda 146 elden 1 mıllıonnan astam jas jınaldy. Italıandyq BAQ-tyń málimetinshe, qajylardyń shamamen 70%-y Batys Eýropadan kelgen. Degenmen messege Ýkraına, Lıvan, Irak, Mıanma, Sırııa jáne Ońtústik Sýdan sekildi qaqtyǵys aımaqtarynan kelgen jastar da qatysqan.

Qudaıǵa qulshylyq etý rásiminde 20 kardınal, 450-deı epıskop jáne 7000-ǵa jýyq dinı qyzmetker qyzmet etti.

Vatıkannyń jastarǵa arnalǵan aptalyq baǵdarlamasy

Jeksenbilik messe Vatıkannyń jastarǵa arnalǵan aptalyq is-sharasynyń qorytyndysy boldy. Baǵdarlama 29 shilde keshinde Rımdegi Áýlıe Petr alańynda ótken messemen bastaldy. Papa jastardy ómirdiń shynaıy maǵynasyn izdeýge shaqyryp, birneshe tilde – onyń ishinde nemis tilinde de – sálemdesti. Ol ýaǵyzyn ıtalıan tilinde bastap, keıin ıspan jáne aǵylshyn tilderinde jalǵastyrdy.

Germanııadan da jeke qajylarmen qatar, Osnabrıýk qalasynan Germanııa epıskoptar konferentsııasynyń Jastar isi jónindegi komıssııa tóraǵasy Iohannes Vıýbbe bastaǵan úlken delegatsııa kelgen. epd agenttigi onyń sózin keltiredi: «Qazirgi ýaqytta osyndaı beıbit atmosfera erekshe áser qaldyrady. Meniń oıymsha, bul — shynaıy beıbitshilik merekesi».

Messeniń sońynda Papa 2027 jyly 3–8 tamyz aralyǵynda ótetin Halyqaralyq jastar kúnine qatysý úshin Seýlge barýdy josparlap otyrǵanyn jarııalady.

Eske sala keteıik, buǵan deıin Rım Papasy Lev XIV beıbitshilik pen «halyqaralyq quqyqty syılaýǵa» shaqyrǵan bolatyn.