Palestınany qoldaǵan stýdentter narazylyǵy búkil Ulybrıtanııany sharpydy
LONDON. KAZINFORM — Ulybrıtanııada ondaǵan iri ýnıversıtettiń stýdenti Palestınany qoldap, narazylyq sharalaryn ótkizip jatyr. Olar oqý ǵımarattarynyń aldyna shatyr tigip, Gazadaǵy soǵysty toqtatýdy talap etýde. Bilim ordalarynyń basshylyǵy jastardy sotqa beremiz dep ses kórsetýde. Jaǵdaıdyń kúrdelengeni sonshalyq eldiń premer-mınıstri birneshe oqý ornynyń basshylyǵyn kezdesýge shaqyryp, antısemıtızmmen kúres máselesin pysyqtady, dep habarlaıdy Kazinform-nyń osy eldegi menshikti tilshisi Ǵalymjan Qaramanuly.
Kembrıdj jáne Oksford sııaqty álemdegi eń bedeldi ýnıversıtetterdiń stýdentteri bilim alýdyń ornyna kóshege shyqty.
Oqý ǵımarattarynyń janynda jastanyp jatyp aldy. Jergilikti turǵyndar arasynan janashyrlar tabylyp, jastardy azyq-túlikpen qamtamasyz etýde.
Narazy top joǵary oqý oryndarynyń basshylyǵynan Izraılmen qarjylyq jáne kásibı baılanysy týraly ashyq aıtýdy, sondaı-aq ýnıversıtetterimen qarym-qatynasyn qaıta qaraýdy talap etedi.
«Halyq ashtyqtyń zardabyn tartyp jatyr. Dál qazir Rafahtaǵy 600 000 balanyń barlyǵy ash otyr — ıÝNISEF statıstıkasy osyndaı. Meniń oıymsha, jaǵdaıdy tek moıyndaı salý azdyq etedi. Buǵan qosa Ulybrıtanııanyń Izraılge áskerı jáne qarjylyq kómek kórsetetinin bilesiz. Osynyń barlyǵyn toqtatyp, naqty áreketterge kóshý qajet. Jaǵdaı alańdatarlyq dep aıtýmen shektelý jetkiliksiz», — deıdi Anna Serafıdıý esimdi stýdent.
Bilim alýshy jastardyń dúmpýi búkil Ulybrıtanııany sharpydy.
London, Nıýkasl, Brıstol, Ýorık, Lıds jáne basqa da qalalardyń stýdentteri ǵımarat aldyndaǵy ashyq alańdarda jınalyp, shatyrlar qurdy.
Belsendilerdi qaıyrymdylyq qorlary qoldap, qol ushyn sozýda. Narazylardyń arasynda, tipti, etnıkalyq evreıler de bar.
Stýdentter ózderiniń qaýipsizdigi úshin qorqady. Túsirilim kezinde betterin jasyryp, shyn esimderin aıtpaýǵa tyrysýda.
«Biz bárimiz shyndyǵynda ne bolyp jatqanynan habardarmyz. Jaǵdaıǵa kóz juma qaraǵanymyz óz-ózimizdi aldaýsyratqanmen teń. Meniń oıymsha, bılikte otyrǵan adamdar, bizdiń úkimetterimiz bárin teriske shyǵarýdyń sheberi bolyp alǵan. Biz Ońtústik Afrıkada ne bolǵanyn kórdik, genotsıdke ushyraǵan basqa halyqtar týraly da habardarmyz», — deıdi esimin atamaýymyzdy suraǵan stýdent.
Stýdentter talaptarymyz oryndalmaıynsha lagerlerdi bosatpaımyz dep otyr.
Jaǵdaıdyń shekten tys shyǵyp ketkeni sonshalyq, úkimet basshysy Ulybrıtanııadaǵy on jeti oqý ornynyń vıtse-kantslerlerin kezdesýge shaqyrdy.
Talqylaýlardyń negizgi taqyryby antısemıtızmmen kúrestiń tıimdi joldary jáne evreı stýdentterdiń qaýipsizdigi boldy.
Rıshı Sýnak sóz bostandyǵy degenimiz basqalardy qorqytýǵa ókilettik berýmen para par emes dep málimdedi.
Ol joǵary oqý oryndarynyń basshylaryna jigerlik tanytýǵa jáne narazylyq bildirýshilerdiń aıtqanymen júrmeýge keńes berdi.
«Ýnıversıtetter kampýstarda beleń alǵan antısemıtızm máselesin jiti baqylaýda ustap otyr. Kezdesýde biz mańyzdy shekaralardy qalaı qoıý kerektigi týraly naqty nusqaýlyqtar aldyq. Halyq narazylyq bildirgen kezde zańǵa qaıshy áreket etpese deımiz», — deıdi Sent-Endrıýs ýnıversıtetiniń vıtse-kantsleri Deım Sallı Mepstoýn.
Keıbir sarapshylar kampýstarda antısemıtızm beleń aldy degen aqparatty joqqa shyǵardy.
Olardyń pikirinshe, stýdentter 60 jyl buryn Vetnam soǵysy kezindegideı ózderiniń azamattyq ustanymdaryn bildirýde.
Izraıldiń saıasatyn moıyndamaı, Gaza sektoryndaǵy áreketterin aıyptap jatqan evreı stýdentteri kóp deıdi sarapshylar.
«Islamofobııa Ulybrıtanııada antısemıtızmge qaraǵanda áldeqaıda úlken problema. Qazirgi úkimettegiler soqyr senimge súıenip, Izraıldi qoldaıdy jáne antısemıtızmniń boıaýyn saıası maqsatta qoıýlandyryp, asyra siltep otyr. Ereýilge shyqqandardyń arasynda evreı stýdentterdiń kóp ekendigin olar eskermeıdi», — deıdi tarıhshy Avı Shlaım.
Narazy stýdentterdiń qozǵalysy búkil Eýropaǵa tarady. Aralarynda polıtsııamen qaqtyǵysqa túsip, qamaýǵa alynǵandar da bar.
Jaqynda Nıderland elinde, Germanııa, Frantsııa, Shveıtsarııa jáne Avstrııada jańa sherýler legi bastaldy.
AQSh kampýstaryndaǵy ereýilderdi qaıtalaǵan stýdentter dáris zalynyń esikterin ishten jaýyp alyp, shyqpaı qoıdy.
Ýnıversıtet múligine zııan keltirip, sabaqtardyń ótýine kedergi jasaǵandardyń ústinen qylmystyq is qozǵaldy.
