Pákistandyq áskerıler Úndistanmen shekarada oq jaýdyrdy

ASTANA. KAZINFORM — Pákistan áskerıleri senbiden jeksenbige qaraǵan túni Úndistannyń Djammý jáne Kashmır odaqtyq aýmaǵyndaǵy baqylaý syzyǵynda oq jaýdyrdy, dep habarlaıdy TASS. 

Bul týraly Úndistannyń PTI agenttigi derekkózderge silteme jasap habarlady.

Shekaradaǵy atys Týtmarı-Galı jáne Rampýr aýdandarynda tirkeldi. Úndistan armııasynyń áskerı qyzmetkerleri jaýap retinde «shaǵyn qarýdan oq» atty, dep málimdedi derekkózder.

Qurbandar týraly aqparat túspedi.

PTI atap ótkendeı, Djammý jáne Kashmırdiń Pahalgam qalasynda bolǵan terrorlyq shabýyldan keıin Úndistan-Pákistan shekarasyndaǵy bitimgershilik týraly kelisim osymen úshinshi ret buzylyp otyr.

Eske salsaq, 22 sáýirde Pahalgamda qarýlanǵan adamdar týrısterge oq jaýdyryp, saldarynan 26 adam qaza taýyp, kóptegen adam jaraqat aldy. Úndistan shabýylǵa Pákistandy aıyptap, jaýap retinde «Ind sýlary týraly kelisimdi» toqtata turdy, pákistandyq dıplomattardy shyǵardy jáne Pákistan azamattaryna vıza berýdi toqtatty.

Óz kezeginde Pákistan aıyptaýlardy joqqa shyǵaryp, Islamabadtaǵy úndistandyq dıplomattar sanyn shektedi, sý resýrstaryna kez kelgen aralasýdy soǵys aktisi dep sanaıtynyn málimdedi, Úndistanmen saýdany toqtatty jáne áýe keńistigin japty.

Degenmen Pákistan Premer-mınıstri Shahbaz Sharıf 22 sáýirde Úndistan qolastyndaǵy Djammý men Kashmırdiń Pahalgam aımaǵynda bolǵan terrorlyq shabýyldy «beıtarap jáne ashyq» tergeýge qatysýǵa daıyn ekenin málimdedi.

Qaıǵyly oqıǵadan keıin Memleket basshysy Úndistannyń Premer-mınıstrine kóńil aıtty.

BUU Bas hatshysy Úndistandaǵy qarýly shabýyldy qatań aıyptady.