Pákistanda qarýly shabýyl saldarynan 7 adam mert boldy

ASTANA. KAZINFORM – Pákistannyń soltústik-batysyndaǵy Haıber-Pahtýnhva provıntsııasynda belgisiz bireýlerdiń polıtsııa kóligine qarýly shabýylynyń saldarynan 7 adam mert boldy, dep habarlaıdy Anadoly Geo News-ke silteme jasap.

Resmı málimetke sáıkes, shabýyl qurbandarynyń altaýy — polıtsııa qyzmetkerleri. Oqıǵa Kohat aýdanyndaǵy Shakardara tasjolynda bolǵan. Qarýly top shabýyldan keıin kólikti órtep jibergen.

Pákistandaǵy terrorlyq qater

Pákistandaǵy qarýly shabýyldar negizinen Haıber-Pahtýnhva jáne Belýdjıstan provıntsııalarynda kóp kezdesedi. Bul óńirler Aýǵanstanmen shektesedi jáne uzaq jyldan beri turaqsyzdyq aımaǵy sanalady.

Atalǵan aımaqtarda pýshtýndar men belýdjdardyń múddesin kózdeıtin túrli qarýly toptar áreket etedi. Olar qaýipsizdik kúshterine de, beıbit turǵyndarǵa da turaqty túrde shabýyl jasap keledi.

Islamabad bıliginiń málimdeýinshe, Pákistandyq «Talıban» — Tehrik-i-Taliban Pakistan (TTP) — Aýǵanstan aýmaǵynda ornalasyp, shabýyldardy shekara syrtynan úılestiredi. Alaıda aýǵan tarapy bul aıyptaýlardy joqqa shyǵarady.

Al Belýdjıstan óńirinde eń belsendi uıymdardyń biri — Belýdjıstan azat etý armııasy (BLA). Bul top provıntsııany Pákistan quramynan bólip, aımaqty basqarýdy jergilikti belýdj halqyna berýdi talap etedi.

Osyǵan deıin Pákistan astanasy meshitindegi jarylystan adamdar qaza bolǵany týraly jazdyq.