Pákistan premeri Úndistandaǵy teraktiniń tergeýine qatysýǵa daıyn
ASTANA. KAZINFORM – Pákistan Premer-mınıstri Shahbaz Sharıf Úndistandy Pákistanǵa qarsy «negizsiz aıyptaýlar men talaptar» qoıdy dep aıyptady, dep jazady Anadoly.
Pákistan Premer-mınıstri Shahbaz Sharıf 22 sáýirde Úndistan qolastyndaǵy Djammý men Kashmırdiń Pahalgam aımaǵynda bolǵan terrorlyq shabýyldy «beıtarap jáne ashyq» tergeýge qatysýǵa daıyn ekenin málimdedi. Bul týraly Dawn gazeti habarlady.
Kakýl aýdanyndaǵy áskerı paradta sóılegen Sharıf Úndistandy Pákistanǵa qarsy «negizsiz aıyptaýlar men talaptar» qoıdy dep aıyptady. Ol Pákistannyń jaýapty memleket retinde kez kelgen táýelsiz jáne obektıvti tekserýge qatysýǵa ashyq ekenin atap ótti.
Sondaı-aq Sharıf Islamabad «Ind sýlary týraly kelisim» boıynsha Pákistanǵa berilgen sý resýrstaryna kez kelgen aralasý áreketine jaýap qaıtaratynyn eskertti.
Pákistannyń Qorǵanys mınıstri Havadja Mýhammad Asıf New York Times amerıkandyq gazetine bergen suhbatynda eldiń halyqaralyq tergeýshilermen yntymaqtasýǵa daıyn ekenin rastady. Ol Pákistannyń qatysy bar ekendigine dálel keltirmeı, Úndistandy terrorlyq shabýyldy «Ind sýlary týraly kelisimdi» toqtata turýǵa syltaý retinde paıdalanýǵa tyrysty dep aıyptady.
— Biz soǵystyń órshýin qalamaımyz, óıtkeni bul áreket aımaq úshin apatqa ákelýi múmkin, — dep atap ótti Asıf.
Buǵan deıin Úndistan áskeri Djammý men Kashmırdegi baqylaý syzyǵynda eki el áskerleri arasynda atys bolǵanyn habarlaǵan. Áskerılerdiń málimetinshe, qaqtyǵystar saldarynan zardap shekkender joq. Aldyńǵy kúni de baqylaý syzyǵy boıynsha shaǵyn atystar tirkelgen.
Eske salsaq, 22 sáýirde Pahalgamda qarýlanǵan adamdar týrısterge oq jaýdyryp, saldarynan 26 adam qaza taýyp, kóptegen adam jaraqat aldy. Úndistan shabýylǵa Pákistandy aıyptap, jaýap retinde «Ind sýlary týraly kelisimdi» toqtata turdy, pákistandyq dıplomattardy shyǵardy jáne Pákistan azamattaryna vıza berýdi toqtatty.
Óz kezeginde Pákistan aıyptaýlardy joqqa shyǵaryp, Islamabadtaǵy úndistandyq dıplomattar sanyn shektedi, sý resýrstaryna kez kelgen aralasýdy soǵys aktisi dep sanaıtynyn málimdedi, Úndistanmen saýdany toqtatty jáne áýe keńistigin japty.
Qaıǵyly oqıǵadan keıin Memleket basshysy Úndistannyń Premer-mınıstrine kóńil aıtty.
BUU Bas hatshysy Úndistandaǵy qarýly shabýyldy qatań aıyptady.